Sadâret-i uzmâdan infisâl ile Gelibolu'da bisât-ı ârâ-yı ikāmet ve birûz-ı nefehât-ı eltâf-ı ilâhiyeye meşamm-güşâ-yı musâberet olan Derviş Mehmed Paşa hakkında avâtıf-ı aliyye-i cihân-bânî erzânî ve şimdilik Hanya Sancağı'yla mazhar-ı sürûr u şâd-mânî kılınmışidi. Gelibolu'dan münharifü'l-mizâc olduğu hâlde sefîneye râkib ve Hanya tarafına zâhib olup sefer-i deryâ ile an-asl me'lûf olmadığından telâtum-ı emvâc tahrîk-i ilel-i emrâz ile müşârünileyhe sebeb-i iztırâb ve ihtilâc olup [Mısraʿ]: ناز پرورد جهانم من کجا دریا کجا Nâz-perverd cihânem men kocâ deryâ kocâ diyerek Sakız cezîresine vusûl ile nefs-ı şehre pây-endâz-ı sükûn ve şehr-i Rebîülâhir'in yedinci isneyn günü masrûʿ-ı ser-pençe-i reybü'l-menûn oldu. Tercüme: Müşârünileyh kırkiki târihinde Yeni Odalar kurbünde mütemekkin Yağlıkçı Kadri Ağa nâm kimsenin sulbünden zuhûr edüp fark-ı sevâd ü sefîd ve temyîz-i kevkeb ü hurşîd melekesine nâil oldukta zînet-bahş-ı sadâret olan zevât-ı refîʿü'ş-şânın evcine mütevâliyen devâtdâr ve nazar-ı iltifâtlarıyla (60a) nakd-i nâsere-i iʿtibârı kâmilü'l-aʿyâr olmuşidi. Bir müddetten sonra defterdâr mektubçusu kalemine müdâvemet ve giderek defterdâr kisedârlığıyla kesb-ı şöhret ve hâcegân zümresine iltihâk ile tahsîl-ı evvelîn pâye-ı merâtib-i devlet edüp sefer hengâmında mâliye tezkereciliği ile nazm-ı ikbâli müstezâd ve çok geçmeden defterdarlık mansıb-ı celîli ile ber-murâd olup üç sene kadar emr-i hatîr-i istifâyı idâre ve Âsitâne'ye geldikte bu dahi sâir erbâb-ı merâtib gibi şugl ü amelden sâkıt ve âvâre olmuşidi. Meded-kâr-ı baht-ı meymûn ile baʿzı vesâit tedârik edüp defterdarlığı tahsîl ve senesini tekmîl etmeden kethüdâlık hidmet-i refîʿasıyla tebcîl olunup bir iki mâh mürûrunda sadrıazam ve vekîl-i mutlak-ı pâdişâh-ı sütûde-şiyem olup ondokuz mâh kadr-i mesned-i sadârette çâr-bâliş-nişîn-i izz ü vakār ve sâât ve evkātı sûr-ı mevsimlerine musâdefe ile ihtilâs-ı mâye-i envâʿ-ı mesâr edüp Nazm: فبتنا على رغم الحسود وبيننا حديث كطيب المسك شيب به الخمر فلما أضاء الصبح فرق بيننا وأي نعيم لا يكدره الدهر Mefhûmu üzere tabʿına ârız olan neşât ü hizzet mübeddel-i envâʿ-ı derd ü mihnet ve an-asl germ ü serd-i rüzgâr ile melûf olmadığından kayd-ı gurbet derûnuna ilkā-yı dehşet edüp giderek bîmâr ve ber-minvâl-i muharrer Sakız Cezîresi'nde raht-endâz-ı hayât-ı müsteʿâr oldu. Nazm: Cihânın kabz u bastı nefʿ ü zarrı ber-karâr olmaz Mücerrebtir binâ muhkem de olsa pây-dâr olmaz. Misâl-i Nûh bin yıl zinde olsa merdüm-i gāfil Peyâm-ı mergi gûş (60b) ettikte bir ân dem-güzâr olmaz. Müşârünileyh fenn-i defterîde mâhir, her maddede istikāmet ve sıtkı zâhir-i sahî ve cevâd ve hâline göre sübha-gerdân-ı ezkâr u evrâd idi. Tabiʿatında tâze rûyân-ı zemâneye meyl ü muhabbet ve her âfet-i nigehân-ı zemâneye incizâb u levʿat der-kâr ve sunʿ-ı ized-i zü'l-celâl olan mir'ât-ı tâb-nâk hüsn ü cemâli temâşâda meslûbü'l-ihtiyâr idi.