Şehr-i Rebîülevvel'in onikinci günü kānûn-ı saltanat-ı Devlet-i aliyye'leri üzere padişâh-ı rûşen-dil istimâʿ-ı mevlid-i Hâtemü'r-rüsül kasdıyla Sultan Ahmed Câmiʿ-i şerîfi'ne nâzil ve dîdâr-ı fâ'izü'l-envârlarıyla o meclis-i akdesde bulunanlar kusvâ-yi mertebe-i sürûr u şâd-mâniye vâsıl olup kırâ'at-i mevlid-i Hazret-i Nebevî hitâmında tevsen-süvâr-ı mecd ü şevket ve saray-ı âlîlerine pâ-nihâde-i yümn ü bereket oldular. Erbâb-ı kalem vaktiyle Bâbıâlî ve defterîye gelmediği tabʿ-ı âsafîye bâʿis-i tahdîş ve erbâb-ı mesâlihin umûru dahi berhem-zede-i taʿtîl ve teşvîş olup fî-mâ-baʿd vakt ü zamâniyle iyâb ü zehâb üzere olmaları içün buyruldular tahrîr ve mütenebbih (59b) olmayanları vaʿîdât-ı ekîde ve tehdîdât-ı şedîde ile inzâr ve tahzîr olundu. Eyyâm-ı bahâr kudûmüyle tabʿ-ı hümâyûnda nakl ü hareket emâreleri bedîdâr ve Muharremülharâm'ın yirmiüçüncü hamîs günü Karaağaç Sâhilhânesi mukaddem feyz-i tev'em-i şâhâneleriyle reşk-fermâ-yı gül-zâr olup letâfet-i bahâr zâil ve şems-i münîr-i burc-ı cevzâya dâhil oldukta taʿna-zen-i hercâ-yı latîf olan Beşiktaş Sarayı'nı teşrîf buyurdular.