İstanbul kadısı olan Hasan Paşazâde Mehmed Saîd Efendi bir sene kadar icrâ-yi ahkâm ve iş bu gurre-i Rebîülevvel'de Abdülvâhid Efendi o makām-ı refîʿ ile ihrâz-ı dest-mâye-i merâm eyledi. Sadrıazam kethüdâsı olan (59a) Seyyid İbrâhim Efendi'nin her hizmete kābiliyet ve istiʿdâdı bedîdâr ve bu keyfiyet zâtına müstedʿî-i tenâfüs ü ihtâr olup sadra gelenler “erbâb-ı istihkākı istihdâm ediyor" denmek için muttaliʿ-i ikbâllerinde müşârünileyhi hidemât-ı refîʿaya te'hîl ve giderek derece-i kābiliyetini derk ile makāmından tenzîl edegeldikleri tecribet-güzâr, her hâmil ve nebîl olup binâberîn sadr-ı vakt dahi tavrını tehcîn ile azlini telhîs ve sudûr-ı ruhsat akabinde müşârünileyhi surre emânetine tahsîs ve mektûbî bulunan Fevzi Süleyman Efendi'nin muhassenâtını tansîs ile kethüdâlık câh-ı vâlâsını efendî-i mûmâileyhe tahlîs eyledi. Münhal olan mektûbçuluk hidmetiyle Dârendeli Nâmık Efendi dest-âver-i şâhid-i emel ve kethüdâ-yi sâbık surre emâneti umûriyle zâhirde kâr-bend-i şugl u amel oldu.