Hindistan sevâhilinden Surat ile Bengale meyânında vâkiʿ Melîbâr ülkesine hâkim olan Sultan Ali Raca etrâfında vâkiʿ Sâmirî keferesiyle (58b) dâimâ muhârebe ve ihrâz-ı mesûbât-ı gazâ eyler iken el-harbu sicâlün muktezâsıyla kefere-i mezbûre hâkim-i müşârünileyhe galebe ile mülkünü gāret ve cihet-i vahdet-i İslâmiyye ile muhtâc-ı iʿânet olduğunu Niyâznâme'sinde işâret etdiğinden fazla dokuz yüz kırkdokuz târîhinde Melîbâr hâkimi tazyîk-i küffâr ile muztarib olduğu hâlde Devlet-i aliyye'den istimdâd ve Yusuf ve Hüseyin isimleriyle mevsûm olan bahâdırlara asker koşulup iki kıtʿa sefîneye teşhîn ve mersâ-yi Cidde'den Melîbâr'a taʿyîn ve hîn-i vusûllerinde kefere üzerine hücûm ve ekserini dâne-i top ve tüfeng ile mercûm eylediklerinden melûf oldukları izrârdan mübâʿadet ve ilâ yevminâ hazâ memleket-i Melîbâr âsûde-i ihtilâl ü fetret iken ber-vech-i muharrer bu hilâlde tâ'ife-i mesfûre tahsîl-i kuvvet ü tâb ve ehl-i islâmı garîk-i lücce-i mihnet ve ıztırâb etmeleriyle kemâ-fi'l-evvel iʿânet ve imdâd olunması bâbında tahrîk-i silsile-i merhamet ü efdâl ve takdîm eylediği iki re's filden biri hâlik olup diğerini sefîri olan şahıs Âsitâne-i saʿâdet'e îsâl edüp manzûr-ı şâhâne olduktan sonra Fazlı Paşa Sarayı'nda bir mahal taʿyîn ve sefîr-i mezbûr taʿyînât-ı vâfiye ile Soğancıbaşızâde Konağı'nda temkîn olundu.