Musul vâlisinden irsâl-i zehâir husûsunda müsâmaha itikādiyle Bağdad vâlisi şikâyet ve eyâlet-i merkūmede ibkāsı tevlîd-i mazarrat eyleyeceğini işâret eylediğinden gayri Şehrizor vâlisi Vezîr Hasan Paşa'ya iʿânet lâzım geldiğini beyân ve Musul Eyâleti ilhâkıyla mübtelâ olduğu ıztırâb-ı hâlden vâreste olmasını âverde-i zebân edüp, Musul Eyâleti iltimâs üzere Hasan Paşa'ya ilhâk olunup selefi Abdülcelilzâde Vezîr Süleyman Paşa'ya eyâlet-i Sivâs tevcîh ve o havâliden tebʿîd ü tenzîh ve selefi Vezîr Yeğen Ali Paşa Konya Eyâleti ile tevkīr ve Yazıcızâde Vezîr Mustafa Paşa Karahisar Sancağı'yla tahkīr olunup, Hotin muhâfızlığı tevcîh olunan Topal Osman Paşa hafîdi Vezîr Mehmed Paşa hilâl-i tarîkte iken Arnavud Süleyman Paşa'nın hüsn-i hâlini müeyyed, Hotin tarafından arz u mahzar vârid olduğuna binâen muhâfaza-i mezkûre kemâ-kân uhdesine tahvîl ve Mehmed Paşa'nın Deliorman nizâmâtı zımnında Hezargrad'da ikāmeti taʿcîl olundu. Yeniçeri ağalığiyle vezâreti cemʿ eden Turnacızâde Ahmed Paşa'nın Rumeli taraflarında istihdâmı menvî-i zamîr ve evâhir-i Muharremülharâm'da Tırhala Sancağı'yla mazhar-ı lutf-ı şehriyâr-ı kişvergîr olup yeniçeri ağalığından maʿzûl ve Gelibolu'da duʿâ-yi devlete meşgûl olan Mehmed Ağa sâniyen ağalık mesnedine mevsûl oldu.