Eyâlet-i Bağdad'a muzâf Baban Sancağı beyzâdelerinden Hâlid Paşa bundan akdem bahane-i cüz'iyye ile ribka-i itâʿatten rû-gerdân ve âzim-i semt-i (57b) İrân olup bir müddetten sonra sahîfe-i cürmüne rakam-ı afv keşîde ve vatan-ı me'lûfuna avd u insirâf ile mu'âheze ve itâbdan ârâmîde olmuşidi. Ancak merkūm muharrik ve müfsid ve İran halkıyla nihânî müttehid ve müteʿahhid olmaktan nâşî kemâ-kân zirve-i inâda su'ûd ve mücâvir ve hevâ-dârı olan Kelhor Hanı'ndan istimdâd ile cem'-i cünûd eyleyüp vekil-i şah olan Zend Kerim'in Kirmanşah tarafından hudûd-ı Bağdad'a Nazar Ali Han'ı ta'yîn ettiğini işâ'at ve bu tarafın seraskerliği tarafına tefvîz olunduğunu hikâyet ederek aʿmâl-i Bağdad'dan Mendelcin kasabası halkını tazyîke mübâderet eylediği, eyâlet-i mezkûre vâlisi Vezîr Abdullah Paşa'ya ihbâr ve der-akab o tarafa asâkir-i cerrâr tertîb ve tisyâr eyleyüp kenâre-i Mendelcin'de tekabül-i Sıffîn vâki' ve iki saat kadar a'mâl-i süyûf kavâri kılınup muhâlifler münhezim ve Bağdadiyân, nesîm-i fevz ü zafer ile mütebessim olup Hâlid Paşa ve akrabâsından Mehmed Bey ve gürûh ekrâd ve Terâkime-i A'câmdan birkaç nefer müteʿayyin kimseler ahz ü katl ve yüz elli kadar efrâd-ı askeri mezbûrlara vasl olunup bakiyetü's-süyûfu birer mahalle firâr eyledikleri ihbârı Saferülhayr'ın beşinci günü vâsıl-ı atebe-i şehriyârî oldu. Müşârünileyhin cilve-ger-i mücellâ-yi bürûz olan gayret ve hamiyeti nezd-i ferd-i mülükânede sezâvâr-ı tahsîn ve teşrîfât-ı seniyye ile dûş ve kemer-bend-i tezyîn ve fî-mâ-ba'd o tarafların tasfiye ve tathîri ve rû-yi muhalefet irâet eden güm-râhların ifnâ ve tedmîri muhavvel-i re'y-i rezînleri (58a) kılındı.