Muharremülharâm'ın yirminci günü İsmail muhâfazası şartıyla taʿmîr-i Bender'e nâmzed olan Vezîr Dağıstanî Ali Paşa'ya Anadolu Eyâleti tevcîh olunup üzerinde olan Rumeli Eyâleti, Bender muhâfazası şartıyla selefi Vezîr Silahdâr Abdullah Paşa'ya ihsân ve Adana Eyâleti'nin ihtilâlini defʿ etmek şartıyla zikr olunan eyâlete İçil Sancağı ilhâk olunup Vezîr Abdullah Paşa'nın memûriyeti istihsân ve Aʿzâz ve Kilis sancağlarıyla Çerkes Hasan Paşa'ya terbiye ve Rakka Eyâleti ilhâkıyla Diyâr-ı Bekir vâlisi ve seraskeri olan Vezîr Hazînedâr Ali Paşa'nın bâzû-yi iktidârına takviye verildi. Şehr-i mezkûrun yirmidördüncü Salı günü tavâif-i askerînin bir kıst mevâcibleri ihrâc ve kabzına memûr olanlara teslîm ve üç gün sonra devr vâki' olup teşrîfât-ı cihân-dâriyle sadrıazam tekrîm olundu.