Bundan akdem şeyhülislâm ve hallâl-i müşkilât-ı enâm olan Salihzâde Mehmed Emin Efendi alâ-tarîki'n-nefy Bursa'ya azîmet ve bir müddet ikāmetten sonra kesret-i ekl ve fart-ı nehem ile me'lûf iken iştihâsına zaʿf-ı (56b) küllî târî ve ekl ü şürbden ârî olup otuz gün bu hâl ile muztarib ve hayatı memâta munkalib olup Kara Çelebi Hüsâm Efendi merkadi kurbünde vâkiʿ suffede medfûn ve alâik-i dünyeviyyeden masûn oldu. Tercüme: Müşârünileyh devr-i Sultan Mustafa Hânî'de sadr-ı Anadolu i'tibâriyle imâm-ı sultânî olan Sâlih Efendi'nin sulbünden mahrûse-i Edirne'de meşîme-çâk-i zuhûr ve nazar-ı ber-endâz-ı âlem-i gayb u huzûr olup bin yüz yirmibeş târihinde Şeyhülislâm Mahmud Efendi'den ahz-i varak-pâre-i mülâzemet ve otuzikide medrese ruûsiyle nâil-i evvelîn-i pâye-i rifʿat ve altmış târihinde Selânik kazâsiyle dâhil-i kıtâr-ı mevâlî ve altmışaltı Muharrem'inde Şam kazâsiyle kadri ʿâlî olmuşidi. Yetmişde Medîne-i Münevvere kazâsiyle kesb-i şeref ve yetmişdörtte İstanbul Hükümeti'yle zâtı mu'arref, seksenbir senesinde sadâret-i Anadolu ile mükerrem ve seksendörtte câme-i i'tibârı tırâz-ı sadâret-i Rum ile mu'lem olup seksendokuz Cumâdelûlâsı'nda nihâl-i ikbâli terbiye-i feyz-i hak ile pür-berk ü verîk ve rütbe-i vâlâ-yi meşîhat-i İslâmiyye ile nihâyet-res-i menzile-i tarîk olup onyedi ay kadar o mesned-i refîʿü'ş-şânı pür-zîb ü fer ve ber-minvâl-i muharrer Bursa'da cânib-i âhirete medd-i pâ-yi sefer eyledi. Müşârünileyhin hân-ı niʿmeti bây ü gedâya meftûh ve civârında vâkiʿ fukarâ ve zuʿafâya bezl-i nevâl ve ednâ hukūku olanlara i'ânet ve efdâl-i zâtına vasf-ı memdûh olup mutâyebâta mâil müctenib-i rezâil, iʿtikād-ı (57a) tâm hulvü'l-kelâm bir zât-ı cemîli's-sıfât idi. Vâridâtı süls-i mâlinden ahz olunacak akārdan olmak üzere Şeyh Murad Efendi Tekyesi fukarasına nân-bahâ ve Hatm-i Hâcegân içün vezâif ve Topkapı havâlisinde vâkiʿ hânesi civârında olan Ahmed Paşa Câmiʿi hüddâmının vazîfelerine beşer akçe zamm ve medresesinde olan talebeye yevmiye birer pâre nân-bahâ ta'yîn ve vakfiyesini bu vechile tedvîn ile ibtigā-yi merzât-ı Rabbü'l-âlemîn eyledi.