Tebrîk-i Muharremülharâm içün sadrıazam ruh-sâ-yi atabe-i şehriyâr-ı İskender-haşem oldukta bir müddetten berü Gelibolu'da mukîm ve muntazır-ı lutf-ı hüdâvend-i rahîm olan Derviş Mehmed Paşa'nın ibkā-yi tuğ ve sancağını istidʿâ ve ricâsı merrât-ı vukūʿda cilve-nümâ olduğundan fazla Hanya muhâfızlığı ile hâiz-i meserret-i evfâ oldu. Tersâne-i âmire'de bir kıt'a fırkateyn inşâsını sadrıazam tasmîm ve Muharrem'in dördüncü günü Defterdâr Hasan Efendi tersâneye geçüp esâsını tanzîm eyledi. Kapudan-ı Deryâ Vezîr Hasan Paşa kereste ahvâline ıttılâʿ ولي مأرب أخرى kavlini veliyy-i devlete ismâʿ akabinde Bursa tarafına âzim ve Bursa Yenişehri cânibinde mürtekib-i envâʿ-ı mezâlim olan Ahmed Bey nâm şakinin diraht-ı bî-bâr vücûdunu tîşe-i siyâsetle hâdim olup ser-i maktûʿunu Âsitâne'ye irsâl ve kerestenin katʿ ve Âsitâne'ye îsâl nizâmâtını verüp baş muhâsebeye kayd içün mufassal takrîr gönderdikten sonra Tersâne-i âmire'ye vazʿ-ı lenger-i istiʿcâl eyledi.