Bundan akdem inşâsına şürûʿ olunan Ejder-i Bahrî nâm kalyon eyâdî-i mehere-i sunnâʿ ile karîn-i hitâm olduğu istimâʿ olunup sadrıaʿzam ve şeyhülislâm efendi ve ağa paşa mukaddemce tersânede hâzır ve kudûm-ı şâhâneye nâzır olmuşlar idi. Padişâh-ı bahr ü berr Tersâne-i âmire'yi teşrîf-i latîfleriyle mânend-i hurşîd-i enver-i pür-zîb ü fer edüp vakt-i muhtâr hulûlünde (55b) o sefîne-i kûh-peykeri deryâya tenzîl ve ferve ve hilʿat erbâbını avârif-i seniyye-i cihân-dârîlerine tenvîl buyurdular. Ömer Vahîd Efendi etbâʿından Lutfî nâm şahsın bir taʿmiye ile inşâd ettiği târihdir: [Mısraʿ]: Çeküp dem püskürüp su, indi bahre Ejder-i Bahrî Kandiye muhâfızı Vezîr Seyyid Numan Paşa nâ'il-i rütbe-i vâlâ olaldan berü tâliʿinde nekbet ve vâlî olduğu mahallerde mahrûm-ı rû-yi râhat olduğundan başka illet-i samem zâtına îrâs-ı naks u ayb ve hücûm-ı şeyb teʿâtî-i umûrda olan meleke ve liyâkatini selb edüp hâline merhamet ve bir mahalde mütekāʿiden duʿâ-yi devlete müdâvemet tasvîb-kerde-i veliyy-i devlet olduğuna binâen, Zilhicce'nin yirmidördüncü günü kayd-ı vezâreti terkīn ve İstanköy cezîresinde ikāme ve temkîn ve münhal olan Kandiye muhâfazasıyla Silistire Vâlîsi Silahdâr Mehmed Paşa memnûn ve Silistire ile Vezîr Yeğen Mehmed Paşa'nın kadr ü rifʿati bâlâ-ter ve efzûn oldu. Tevcîhâtta baş muhâsebeden şehremânetine intikāl eden Nazîf Ahmed Efendi yevm-i mezkûrda Matbah-ı âmire'ye emîn ve selefleri Kirli İbrâhîm Efendi emânet-i şehr ile kâm-bîn oldu. Subhîzâde Azîz Efendi'nin zîrde âtî ilel ü esbâb ile azli iktizâ ve İstanbul'dan maʿzûl Ârif Efendi riyâset-i etibbâ ile bu defʿa dahi derece-i kurbiyete iʿtilâ eyledi. Anadolu kasabâtından Köprü ve Merzifon ve Amasya'da bi-emrillâh zelzele zuhûr edüp baʿzı ebniye sukūtundan fazla Köprülü Oğlu Câmiʿi ve baʿzı mesâcidin inhidâma müstaʿid olan (56a) mahalleri mütesâkıt ve Köprü kasabasında yüz kadar âdemin helâkiyle ahvâl-i ahâli muhtebıt olduğu baʿzı vesâit ile dâhil-i dehlîz mesâmiʿ-i hükkâm ve zavâbıt oldu.