Bundan akdem muhkem yasak ile ziyy ü libâs-ı nâs taʿdîl ve mü'temir olmayanlar tenkîl olunacağı tafsîl olunmuşidi. Hademe ve ehl-i hiref hükm-i yasağı ber-taraf edüp kemâkân tavr-ı sefîh-âneye cesâret ve telli pullu esvâb ile arz-ı zînet edüp baʿzısı bu vesîle ile müddehirini ifnâ ve baʿzısı irtikâb-ı mekârih-i umûr ile tahsîl-i metâʿ ve eşyâ edüp bu hâlet tâife-i nisvâna dahi sirâyet ve melbûsât-ı zâhire ve bâtınalarına envâʿ-ı zîb ile sûret vererek “velâ yübdîne zînetehenne illâ libuʿûletihinne” emr-i şerîfinden gaflet eyledikleri maʿlûm-ı sadr-ı cedîd ve bu bidʿat-ı seyyienin refʿinde dâʿiye-i himmetleri ber-mezîd olup İstanbul kadısına hitâben emr-i âlî ısdâr ve gürûh-ı hayyâtîn o makūle fâhiş esvâb katʿı için tahvîf ve inzâr ve fî-mâ-baʿd kâr-ı dîrîn üzere kesip biçmeye ibtidâr edüp bu defʿa dahi mütenebbih olmadıkları hâlde hâyıt ve lâbis üftâde-i matmûre-i mahâbis olacakları tenbîh ü ifhâm ve bu savlet-i nâgeh-zûrdan herkes haddini bilüp terk-i zînet ü ihtişâm ettiler. Garîbe: Derviş Paşa gününde mevkūfât mansıbı sâbıkā Mektûbî Besim (51b) Efendi üzerinde bulunup, bi'l-iktizâ Bağdad defterdârı nasb olundukta harc-ı râha tâlib ve mansıb-ı mezkûr Kirpasî İbrâhim Efendi'ye tevcîh ve bu mukābelede beş bin guruş alınup Besim Efendi'ye teslîm ile Bağdad'a zâhib olmuş idi. İbrâhim Efendi birkaç gün tasarruf-ı mansıb ile izhâr-ı beşâşet etmiş iken duhânî nasb ettiği tıfl-ı emrde tebdîlen sadrıazam hazretleri Bahçe Kapısı'nda tesâdüf ve destâr-ı perîşân ve mutallâ haftanına nazar ile efrâd-ı gazabı tezâʿuf edüp gulâm-ı mezkûru habs ü tenkîl ve Kirpasî'yi azl ile tezlîl edüp, bu vazʿ-ı garîb o makūle süfehâya medâr-ı te'dîb olup bir müddet bâbâyâne libâs telbîsiyle dâhil-i dâire-i hadd ü edeb ve zuhûr eden tehdîd-i şedîd ile bir zaman tersân-ı ukūbet ve gazab-ı sadr-ı sütûde-meşreb oldular.