Birbuçuk seneden efzûn sadâret-i uzmâ ile memnûn olan Derviş Mehmed Paşa'nın an-asl tâliʿi kuvvette ve necm-i bahtı evc-i rifʿatte olup dest-yâr-ı ikbâl ile sadrıazam oluncaya dek uhdesine tefvîz olunan hidemâtı meded-kârî-i muʿâvin ve nasîr ve inzimâm-ı himem-i ehl-i tedbîr ile temşiyet-pezîr eylediğinden başka bast-ı keff ve lâzım gelen mahallere bezl ü sarf semtini bilüp bu keyfiyet ikbâlini müzdâd ve giderek gāyet mertebe-i beşeriyye olan vekâlet-i mutlaka ile kesb-i aksâ-yı murâd eyledi. Aksâm-ı ubûdiyyet ve siyâseti şâmil olan adl ü dâd ve rahm-i sunûf-ı ibâd mesleğine zehâb ile tahsîl-i rızâ-yı Rabbü'l-erbâb etmek lâzım iken cell-i himmeti devâ'î hevâ vü hevese masrûf ve umûr-ı devlete mübâlât ile tarîk-i hakkı rü'yetten mahcûb ve mekfüf olup istilâ-yı aʿdâ ile harâb ve âşiyâne-i bûm u gurâb olan serhadler ahvâline dikkat etmeyüp ahâli-i sügür mübtelâ-yı nefsetü'l-masdûr ve zücâce-i hâtırları meksûr olup niʿam-ı celîlesiyle mütenaʿim olanlar ikāzdan tebâʿüd ve her fiʿlini istihsân ile meclûbâtlarına takayyüd edüp setr-i maʿâyibi ile iştigāl ve umûr-ı devleti kemâ-yenbagî icrâya saʿy-i bî-hemâl eden Reisülküttâb İsmail Bey-efendi'yi ve kethüdâ nasbettiği Esseyyid İbrahim Efendi'yi hakka delâlet ve irşâd ettikleri (50b) içün makāmlarından ibʿâd ve hatb-ı cesîm-i devleti keyfe-mâ erâd re'y-i muʿavveciyle idâre edüp tertîb ettiği mukaddemât müntic-i fesâd ve kâffe-i tedâbîri sebeb-i ihtilâl-i emsâr ü bilâd olup bu esbâb-ı mütetâbiʿüz-zuhûr tabʿ-ı şâhâneye müstelzim-i tevârüd-i nüfûr olup iş bu Zilkadetüşşerîfe'nin yirmibeşinci günü Kapıcılar Kethüdâsı Çerkes Mehmed Bey vesâtatiyle mühr-i hümâyûn yedinden ahz ve istirdâd ve Enderûn-ı Hümâyûn'da vâkiʿ Ağayeri taʿbîr olunan mahalde ikʿâd olunup ferdâsı sandal ile Silivri'ye îsâl ve çerâğ-ı efrûhtesi olan silahdâr ağası mübâşereti ile mahall-i ikāmet tahsîs olunan Gelibolu'ya irsâl olundu. Bâlâda ahvâli iş'âr ve kethüdâlık ile sadâret-i uzmâya ihzâr olunan Darendeli Mehmed Ağa silahdâr-ı hazret-i şehriyârî vesâtatiyle Enderun'a celb olunup mühr-i sadâret-i uzmâ yedine teslîm ve ferve-i vekâlet-i kübrâ ile tekrîm olunup selefinin mesâvisi taʿdâd ve kendüsinden hidmet-i nâfiʿa me'mûl olunduğu zikr ü îrâd olunup erbâb-ı haysiyet ve istihkākı lâyıkıyla istihdâm ve meşreb ü meslekinde ihânet-i mahsûs olanları hüccet-i te'dîb ile ilzâm ve umûr-ı cüz'iye ve külliyeyi ittifâk-ı hayr-hâhân-ı saltanatla tesviye ve bâ-husûs serhadlerin esbâb-ı takviyesi tediye olunmak tenbîhâtı sadr-ı müşârünileyhe vicâhen ifâde ve duʿâ-yi hayr-ı mülûkâne ile saray-i âsafânelerine iʿâde olundu. Münhal olan kethüdâlık hidmet-i celîlesi iki defʿa o makām-ı refîʿi ihrâz ve beyne'r-ricâl kesb-i taʿayyün ü imtiyâz eden Esseyyid İbrâhim Efendi'ye sâlisen tevcîh-i bâʿis-i tahsîn hâmil ve tenbîh (51a) oldu. Münhal olan nişancılık mansıbı dahi kudemâ-yi ricâlden Recâi Mehmed Efendi'ye tevcîh ve inâyet ve celb-i hâtırma mübâderet olunup Feyzi Ağa'nın araz-ı mansıbı dahi sadr-ı sabıkın cevher-i zâtiyle kāim olup devletinden hisse-mend olduğu gibi eyyâm-ı edbârından dahi nasibini istîfâ yaʿni mutasarrıf olduğu silahdâr ağalığından azl olunup mansıb-ı mezkûr ile Kapıcıbaşı Genç Osman Ağa tahsîl-i zîb ü bahâ eyledi.