Bir müddetten berü sunûf-ı talebe zuhûr-ı imtihâna hasret-keş ve adem-i yümn tecrübesiyle makām-ı iftâda olanların fikri bu bâbda müşevveş olup "laʿalle ve asâ ile imrâr-ı subh u mesâ ve umûr-ı fitne merhûndur" diyerek tâife-i mezkûreyi ye's derecelerine resâ eyledikleri hasebiyle selef efendi vaktinde refʿ-ı rukʿa-i iştikâ eyledikleri bâlâda îmâ olunmuşidi. Şeyhülislâm-ı vakt hazretleri hallerine merhamet edüp nasblarından beş on gün sonra Mutavvel'den bir bahis açup inde'l-imtihân [50a] "Yükremü'l-mer'u ev yühan" mefhûmu üzere kırâete muvaffak olanlar ruûs ile münşerihü's-sudûr ve olmayanlar bakıyye-i imtihân iʿtibâr olunup aralıkta ber-murâd olacakları va'diyle mesrûr oldular.