Müşârünileyh (49b) vücûd-ı kābiliyet ile kem-nâm ve taşrada baʿzen istihdâm olunarak zarûretini defʿe pâ-ber-câ-yi merkez-i ihtimâm olup sadrıazam olan Derviş Mehmed Paşa'nın evzâʿından şehriyâr-ı sütûde-girdâr dilgîr ve dekāyık-ı umûr-ı devlete vâkıf ve habîr olmadığından başka alenen lehv ü taraba inhimâki sebebi ile azli halîde-i zamîr-i münîr olup mukarribân-ı saltanattan baʿzıları ağa-yi mûmileyhin rüşd ü reviyyet ve kemâl ü dirâyetini tavsîf ve makām-ı sadârete şâyân olduğunu resm ü haddiyle taʿrîf edüp, şöyle ki bu makām-ı vâlâya nasb olunduğu hâlde bâdî-i emirde hâmilü'z-zikr ve sâkıt ani'n-nazar görülen Köprülü vezîr gibi Devlet-i aliyye'ye nizâm ve merkez-i aslîsini tahsîl ile kavânîn-i devlete devâm vereceğini müdellel ve müberhen mukaddimât ile arz-ı huzûr-ı pâdişâh-ı enâm eylediklerinde tabîʿat-ı câzibe ve nüfûs-ı mâile olmak haysiyeti ile bu tedbîr tabʿ-ı hümâyûna tesîr edüp, sadârete istiʿdâd gelmek sûretinde kethüdâlık mesnedine isʿâd ve selefi Lâleli Mustafa Efendi hânesinde ikʿâd olundu.