Müşârünileyhe bundan akdem Sivas Eyâleti tevcîh ve ihsân olunup Selânik'ten münharifü'l-mizâc olduğu hâlde Sivas'a doğru râhil ve Nallıhan nâm mahalle vâsıl oldukta dest-i garîm-i ecel müşârünileyhi zâr u zebûn ve herkes hakkında tertîl-i innâ lillâhi ve innâ ileyhi râciʿûn eyledi. Münhal olan mansıbı Erzurum vâlîsi ve Kars cânibi seraskeri olan Vezîr Alî Paşa'ya tevcîh ve inâyet ve Hotin muhâfızı nasb olunan Vezîr Süleymân Paşa'da emârât-ı rehâvet zâhir ve bâ-husûs hilâl-i tarîkde kapısı halkı perîşân ve münteşir ve bu hâl ile (49a) icrâ-yı me'mûriyetde dest-i iktidarı kāsır olacağı vârid-i hâtır-ı ekâbir olduğuna binâen kalʿa-i mezkûre muhâfazası şurût-ı sâbıkası üzere İnebahtı muhâfızı olan Vezîr Mehmed Paşa'ya Yanya ve Üsküb sancakları inzimâmıyla tefvîz ve İnebahtı Sancağıyla Süleymân Paşa mazhar-ı dûr-bâş-ı dahl ü taʿrîz kılındı. Tercüme: Müşârünileyh Belgrad fâtihi olan sadr-ı esbak İvaz Mehmed Paşa merhûmun sulbünden otuzyedi târîhinde ser-nümâ-yı sâha-i taʿayyün ve mebâdî-i cüvânî ve unfuvân-ı zindegânîyi tekmîl, akabinde pederleriyle seyr-i emsâr ü müdün eyleyüp devr-i Mahmûd Hânî'den vezâreti vaktine gelinceye dek rikâb hizmetlerinde müstahdem ve Tevfîkî Alî Paşa'dan sonra vezîriazam ve sipeh-sâlâr-ı ekrem olmuşidi. Vakt-i sadâretlerinde selefleri gibi Devlet-i aliyye'ye nâfî bir hidmete muvaffak olmayup azl ve bilâ- musâdere Filibe'ye nakl olunup bir müddetden sonra ba'zı menâsıb ile mükerrem ve târih-i mezkûrda diyâr-ı ademe vazʿ-ı kadem eyledi. Müşârünileyh çelebi ve nâzik-mizâc ve zâtında tarîk-i ülfet ve istimzâc-ı hüner ü kemâlden behre-mend ve etvâr u harekâtı şâyân-ı tahsîn ü pesend, istimâʿ-ı agânî ve esvât-ı müessireye dil-dâde ve hüsn-i sûret ü ciyâdet-i sîret erbâbına âşık-ı üftâde olup hilye-i cûd ü sehâ ile mütehallî ve eshâb-ı hâcât kavlen ve fiʿlen vazʿ-ı âlem-pesendinden mütesellî idi. Cûd u sehâsı mertebe-i ifrâta resîde olduğundan beyliği ve vezâreti hâlinde müzâyakadan vâreste olmayup hattâ sadâretden azl olundukta mîrîye bin kîseye karîb deyn-i sahîhi zuhûr ettiği mütevâtir ve meşhûrdur.