Sadâret-i mezbûreye mutasarrıf olan İshak Efendizâde Şerîf Molla Efendi pîr-i kühen-sâl olmak cihetiyle kuvâ ve havassı baʿzı emrâz-ı müzmine ile muʿattal ve mâh-ı Zilkade'de hazîne-i bedeninde vedîʿa olan cevher-i rûhu müsellem-i dest-i ecel olup münhal olan Anadolu kazaskerliği ile bi-hasebi'n-nevbe Alemî Damadı Ali Efendi mübeccel oldu. Müteveffâ-yi müşârünileyh ümmî ve sâde-dil ve ahvâl-i kâinâttan gâfil olup hattâ uzemâ-yi ulemâdan birinin meclisinde İsakçı Köprüsü'nün tuğyân-ı nehr-i Tuna sebebi ile imtinâʿ-ı inşâsı müzâkere ve harîta der-miyân olunup Kartal ile İsakçı miyânını tekātuʿ eden hatt-ı mefrûza müşârünileyh nazar ve "bu ednâ mevziʿe köprü binâsı ne lâzım, süvâri şu kadar yerden bilâ-tekellüf güzâr etmek kābildir". deyü tefevvüh ettiğini hâzır bi'l-meclis olanların baʿzısı etrâfa haber verüp bundan başka Anadolu sadâretine pâ-nihâde oldukta, huzûrda ve Bâbıâlî'de münʿakid olan meclis-i meşverete muktezâ-yi rütbe ile dâhil olup mahremlerinin birine "şimdi hilye-i akl ile mümtâz olduğumu fehm ettim. Muhâtabı bu keyfiyete neden intikāl ettiniz” dedikte "sudûr-ı kirâma mültehik olmazdan mukaddem bizi meşverete daʿvet etmezler idi. Bu rütbeye akl tabʿan mülâzim olduğundan derece-i hûş-mend-âne bülûğ ile hiffet ü tayş-ı akl-ı heyûllânîden vâreste olduğumu ancak şimdi idrâk ettim" dediğini mevsûkü'l-kelim kimseler rivâyet ve bu keyfiyetler (48b) derece-i hâlini ifadeye kifâyet eyleyeceği maʿlûm-ı erbâb-ı dirâyettir.