Sadr-ı âlî-kadr hazretleri âm-ı mâzîde sebkat ettiği gibi padişâh-ı dil-âgâh hazretlerini kemâl-i tazarruʿ ve meskenet ile Paşa-kapısı'na daʿvet ile tertîb-i ziyâfet ve şehinşâh-ı pâkize-tıynet daʿvetine icâbet buyurup: [Mısra:] Görse-ger tantana-i câhını çeşm-i hâkān [Mısra:] Olmak isterdi der-i maʿdeletinde derbân. Mefhûmunda münbaʿis debdebe-i mülûkâneleriyle Sarây-i âsafî'ye pâ-nihâde-i izz ü şân olup bir zamân istimâʿ-ı esvât-ı hânende-gân ve sâzende-gân ile kesb-i neşât ve bir zamân temâşâ-yi raks-ı hûb-rûyân ile celb-i mâye-i şâdî ve inbisât buyurup vakt-i şâm tenâvül-i taʿâm ve sadr-ı müşârünileyh ile hâzır-bi'l-meclis olan şeyhülislâm ve kapudan paşaya birer sevb-i semmûr kürk ilbâs ve azîmet-i şâhâneleri ihsâs olundukta mukaddemce ihzâr olunan cevâhir-i abdâr ve derârî-i tâb-dâr hâk-i pâ-yi hümâyûnlarına nisâr ve seng-i rikâbda keşîde ve ihzâr olunan esb-i berk-i reftâra süvâr ve saray-i âlîlerine pây-endâz-ı şevket ü vakār oldular.