İş bu Şevvalülmükerrem'in yedinci günü âdet-i dîrîn-i Devlet-i ebed-karîn üzere tevcîhât vâkiʿ olup hüddâm-ı Bâbıâlî ile rikâb ağaları ve şıkk-ı evvel ve sânî ve sâlis bi-ecmaʿihim ibkā olunup, defter emâneti ile re'îs-i esbak Elhâc Abdürrezzak Efendi taltîf ve baş muhâsebe ile Hâşim Ali Bey ve Anadolu muhâsebeciliği ile Esseyyid Abdülkerim Efendi te'lîf olunup Şehremâneti Nazîf Ahmed Efendi'ye tevcîh ve süvâri mukābeleciliği ile Âtıfzâde Ahmed Bey'in kadri tenvîh ve cizye muhâsebeciliği ile Nuri Bey'in hâli terfîh olundu. Sipâh kitâbeti ile Nahîfî Efendi kuvvet-yâb ve küçük rûznâmeye Safiye Sultanzâde Mehmed Sâdık Efendi intihâb olunup piyâde mukābeleciliği ile Râfet Mustafa Efendi tebşîr ve küçük evkāf ruûsu Nâmık Efendi'nin defter-i âmâline kayd ü tahrîr ve bakāyā-yi erbâb-ı menâsıb, hall-i ilâhî sünûhuna ve sene-i âtiye tevcîhâtına, te'hîr olunup baʿzıları dahi atâyâ-yi şâhâne ile def-i zarûret ve ihzâr-ı esbâb-ı maʿîşet eyledi. Ocak ağalıklarından sipah ağalığı Hatibzâde (46a) Ahmed Ağa'ya sezâ ve silahdâr ağalığı müntemiyân-ı sadr-ı vâlâ-şândan Feyzi Ağa'ya revâ görülüp, cebecibaşılık sâbıkı Kürd Mehmed Ağa'ya ihsân ve arabacıbaşılık ile Süleyman Ağa ve Tophâne Nezâreti ile yazıcı-i sâbık Ahmed Efendi kâm-rân kılındı.