Bir müddetten berü Akkâ ve Dürzî dağlarında muhâlefet-i pâdişâh-ı rû-yi zemîn ile şakk-ı asâ-yi müslimîn edüp cezâ-yi mâyelîki bundan akdem tertîb ve binâ-yi nâ-üstüvâr-ı ömrü tîşe-i siyâset ile tahrîb olunan Zâhir Ömer'in oğlu Ali Tâhir sergüzeşt-i peder-i bed-ahterden hisse-mend olmayup, hubs-ı tabîʿat ve fesâd-ı cibillet iktizâsıyla o havâlîde kesb-i taʿayyün ve iştihâr ve nehb-i emvâl-i zuʿafâ ile sâhib-i miknet ve iktidâr olup evâmir-i Devlet-i aliyye'ye muhâlefet ve Sayda vâlîlerine cevr ü eziyyet ve hakkından gelinmediği takdîrde babasından ziyâde fesâda tasaddî edeceğini o tarafta bulunan hükkâm arz u işâret etmişler idi. Gubâr-ı fitnesi tekâsüf ve kuvvet ü mikneti tezâʿuf kabûl etmeden iʿdâmına ikdâm, şerîta-i siyâsete muvâfık ve tarîka-i huzem ü ihtiyâta mutâbık olduğundan istîsâl-i husûlü kapudan paşa ve Sayda ve Şam vâlîlerine ihâle ve müşârünileyhim üzerine vardıklarında acz-âver mukābele olarak firâra âğâz ve bir müddetten sonra Sayda etrâfında vâkiʿ Mînâ gölü nâm mahalde cemʿ-i asker ile dest-i melʿanetini dırâz edüp o gürg-i bârân-dîdenin suhûletle dâm-ı sayda giriftâr olmayacağı (45b) Şam vâlîsine maʿlûm olup, levend baş ağasını sûret-i tasannuʿda dâiresinden tard u ibʿâd ve şakî-i merkūma tebaʿiyyet ve iʿtimâd verdikten sonra katlini tenbîh ile hakkında kerâim-i hüsn-i mükâfâtı iʿdâd etmişidi. Ağa-yi mûmâileyh Şam vâlîsinden rû-gerdân olduğunu beyân ve sıdk-ı kavlini te'vîl ile müekked-bi'l-îmân edüp bir hâl ile fırsat-yâb olup şakî-i merkūmu istîsâl ve ser-i maktūʿunu Şam vâlîsi berîd-i serîʿü's-seyr ile Âsitâne'ye irsâl eyledi.