Pâdişâh-ı sâhib-i intibâh hazretlerinin kalb-i âgâhlarında ibtigā-yı merzât-ı ilâhiye cilve-ger ve bir imâret binâsıyla tahlîd-i zikr-i cemîlleri mukarrer olup binâen-alâ-zâlik Bahçe-kapusu kurbünde re'îs-i sâbık Râif İsmâʿîl Beyefendi'nin arsa-i hâliyesi iştirâ ve mâh-ı Cumâdelâhire'nin yirmiüçüncü günü sadrıaʿzam ve şeyhülislâm efendi hâzır oldukları hâlde dest-i duʿâ-yı berdâşte-i dergâh-ı Mevlâ ve zebh-i karâbîn ile itʿâm-ı fukarâ kılınup çîre-destî-i mehere-i binâyân ile vazʿ-ı fâs ve hafr-i esâs ve tekmîlini Hâlik-i umûm-ı nâsdan niyâz ve iltimâs eylediler. Hotin kalesi (44b) muhâsara ve istilâ sebebi ile vîrân ve lüzûm-ı taʿmîri zâhir ü ayân olduğuna binâen kalʿa-i mezkûreyi taʿmîr ve hendeğini tathîr, Ohri mutasarrıfı Vezîr Ahmed Paşa uhdesine tefvîz ve selefi Melek Mehmed Paşa'nın Belgrad muhâfızlığı ile müsvedde-i ikbâli tebyîz olunup selefi Vezîr Seyyid Hasan Paşa Mora mansıbı ile minnettâr ve selefi Silahdâr İbrâhim Paşa Selânik Sancağıyla vâyedâr-ı izz ü iʿtibâr olup, selefi sadr-ı esbak Halil Paşa Sivas ile mazhar-ı lutf-ı bî-kıyâs ve selefi Kāimmakām Silahdâr Abdullah Paşa Anadolu Eyâletiyle vâreste-i ednâs-ı iflâs oldu. Selefi Hazînedâr Ali Paşa'ya Diyarbekir Eyâleti tasvîb ve selefi Vezîr Abdi Paşa Maraş Eyâleti ile tenkîb ve Karaman Vâlîsi Çerkes Hasan Paşa İç-il Sancağı'na mutasarrıf ve selefi Yazıcızâde Mustafa Paşa Karaman Eyâleti'ne mutasarrıf oldu.