Ferʿ-i Hazret-i Mevlânâ kuddise sırrahu'l-azîzden Çelebi Efendi hakkında Karaman Vâlîsi Çerkes Paşa hilâf-ı vâkiʿ-i baʿzı keyfiyet inhâ ve ihtilâl-i beldeye illet olduğunu işʿâr ile bir mahalle nefyini istidʿâ etmiş idi. Arzına binâen mûmâileyh Manisa'ya iclâ olunmuş idi. Hakkında tertîb olunan ifk-i (44a) iftirâ [ve] isnâdât erbâb-ı ağrâzdan tevellüd eylediği zâhir ve hüveydâ olup işâret-i cenâb-ı fetvâ-penâhî muktezâsınca ıtlâk ve hakkında ebvâb-ı isâet-i nâs iğlâk olundu. İş bu Zilkaʿde gurresinden zabt etmek üzere hükûmet-i İzmir Samancızâde Ömer Efendi ismine tahrîr ve Yenişehir kazâsı ile Celâl Molla Efendi tevkīr ve Selânik Mevleviyeti ile Köprülü İmâmzâde Ahmed Efendi'nin çeşm-i ibtihâcı tenvîr olundu. Zât-ı behcet-simât-ı mülûkâneye muhtass olan sandal ile fülke-i hümâyûnun bundan akdem inşâsına ibtidâr ve bu esnâda hitâma resîde olduğu ihbâr ve Şaʿbânülmuazzam'ın on sekizinci günü sadrıaʿzam ve şeyhülislâm efendi ve sâir memûrlar âmâde ve duʿâ-yı pâdişâhî zımnında dest-i ibtihâli güşâde ettikten sonra sandal ve fülkeyi rû-yı deryâya tenzîl ile hizmetlerin tekmîl eylediler.