Hâfız Mustafa Paşa, Ömer Paşa gāilesini ber-taraf edüp emvâl ve eşyasını kabz ettikten (42b) sonra Zend Kerim'in kutr-ı Irak'a tasarruf niyeti ile her tarafa asker taʿyîn ve Basra'yı muhâsara eden birâderi Sâdık Han Basra halkına zarar gelmemek üzere half ü yemîn edüp iʿtimâd verdikten sonra beyʿ ü şirâ sûretinde şehre askerinin duhûl ve hurûcunu istidʿâ ve tarafeyne fevâid-i ticaret husûlünü iddiʿâ edüp tamaʿ-kârân-ı belde bu kavle rızâ-dâde ve bir iki gün miyânelerinde dâd u sited kapuları güşâde olup nâ-gâh Sâdık Han Basra'ya duhûl ve şehri zabt ile hakk-ı şâhî cemʿine meşgûl olup mütesellimi olan Süleyman Ağa'yı ki sonra Bağdad'a vâli ve adl ü dâdı sebeb-i istirahat-i esâfil ü eʿâli olmuş idi. Basra'da cemʿ ve ihtilâs ettiği tefârik ve tuhaf ile şî-zâde ibʿâs ve etrâf ve eknâfa ruʿb u hirâs eylediğini ve bu masâibin defʿi dâireleri muntazam birkaç vezîr ve küllî asâkir ve zehâir irsâline menût idüğü müşârünileyh tarafından mufassal ve meşrûh tahrîrât ile karʿ-ı sâmiʿa-i devlet ve filhâl Diyarbekir Vâlisi Vezîr Abdi Paşa'ya vâfır asker koşulup külliyetli zehâir ve mühimmat dahi irsâl ve Bağdad'a vusûlü istiʿcâl olunmuşidi. Ömer Paşa emr-i ʿâlî-şâna imtisâl edüp mansıbı tarafına şedd-i ahmâl-i irtihâl üzere iken Hâfız Paşa'nın hilâf-ı emr-i ʿâlî tertîb-i cezasına müsâraʿati zabt-ı emvâl-i bî-şümârına tavtiʿa kabilinden olduğunu evliyâ-yi umûr tashîh ve bu garaz husûlünden sonra ağniyâ ve tüccâr-ı memleketi defʿ-i sevret-i Aʿcâm şâyiʿasiyle tecrîm eylediğini menhiyyen ihbâr-ı tasrîh edüp maddeteyn-i mezkûreteyn ahâlî-i Bağdad'ı tebrîd ve müşârünileyhe iʿânet ve imdâd etmek vâdisinden tebʿîd ettiğini Abdi Paşa dahi Bağdad'a vusûlünde tahkīk ve rivâyet-i evveliyi tasdîk edüp fî-mâ-baʿd Hâfız Paşa'nın Bağdad'da ikāmeti muzırr ve bir fitne hudûsuna sebeb olacağı ezhân-ı kâr-şinâsân-ı (43a) zemânede müstakar olup Bağdad Eyâleti sırren Abdi Paşa'ya tevcîh ve bu keyfiyetin Bağdad'a duhûlünden mukaddem ifşâ olunmaması tenbîh olunup müşârünileyh dahi tevfîk-i Hak'dan mahrûm ve gulüvv-i ahâlî ile Bağdad'dan çıkup rû-be-râh-ı cânib-i Rum olduğu, kâr-fermâyân-ı devlete maʿlûm oldukta Bağdad Eyâleti ahvâl-i Irak'a âşinâ bir kimseye tevcîh olunmak ecânibden evlâ ve bâlâda beyân olunduğu vech üzere baʿde'l-istiftâ tavâif-i Kızılbaş üzerine asker taʿyîni karâr-dâde-i erbâb-ı şûrâ olup kethüdâlardan Abdullah Ağa ve Mardin voyvodası Hasan Ağa'da âsâr-ı meleke ve istiʿdâd nümâyân ve ikisi de şân-ı vezârete şâyân olmalarıyla Basra'yı dest-i Aʿcâm'dan tahlîs şartıyla Bağdad Eyâleti Abdullah Ağa'ya ve Şehrizor Eyâleti Hasan Ağa'ya rütbe-i vâlâ-yi vezâretle ihsân ve şimdilik bu tertîbât ile itfâ-yi nâr-ı sûzân kılındı.