Dîvân-ı âlî'de ser-çavuşân olan Mehmed Said Efendi'nin rehâveti bâʿis-i üfûl-i necm-i rifʿati olup şehr-i Rebîülâhir'in onyedinci günü zehr-âbe-nûş-i azl ü infisâl ve Hamza Paşa kethüdâsı Mehmed Ağa o hidmet-i refîʿa ile nâil-i izz ü ikbâl oldu. Defterdar-ı vakt olan Recâî Mehmed Efendi kesret-i mübâʿazadan nâşî zaʿf-ı basara mübtelâ ve hidmet-i istîfâya terettüb eden kesret-i tahrîrât illet-i mezkûreyi dü-bâlâ edüp mansıbından istiʿfâ ve niyâzı semʿ-i kabûle karîn ve iş bu Cumadelulâ'da azl ve hânesinde mekîn olup mâlikâne halîfesi olan Hasan Efendi fenn-i defterîde mâhir ve ahz ü defʿ hususlarında meleke ve kābiliyeti meczûm-ı erbâb-ı zavâhir olduğuna binâen yevm-i mezkûrda defterdâr ve emîn-i hazâin-i şehriyâr-ı ʿâlî-tebâr oldu. Donanma-yi hümâyûnun eyyâm-ı baharda Bahr-i sefîd'e tesyîri ʿâdet-i dîrîn-i devlet olmaktan nâşî bu eyyâm-ı sürûr-ı encâmda tertîb olunan sefâin ve merâkib ile Kapudan-ı Derya Vezîr Hasan Paşa Akdeniz'e doğru zâhib oldu.