Elçi-i mezbûr rind-i cihân-dîde ve füsûn-sâz ve tesviye-i umûr-ı izâmda alâ-zuʿme yektâ-rev ve bâlâ-pervâz olup devletinde nüfûz-ı kelâmını iʿlân ve dil-hâhı olan maddeleri temşiyetde vücûd kudretini beyân ile cerr-i menfaʿat semtini nefsine teshîl ve âsân edüp, şöyle ki, Devlet-i aliyye'nin serbestiyet ve zabt-ı kılâʿ mâddesinde olan iztırâbını ihsâs ile tehvîn-i maslahata taʿahhüd sûretini izhâr ve erkân-ı devleti bu hadîʿa-i serbeste pâ-bend-i ikāl-i iğtirâr edüp Avrupa ahvâlinden bî-haber baʿzı kimseler mesfûrun bast ettiği mukaddemât-ı lâgıyyesine vücûd verüp ikrâmında mübâlagayı teşvîk ve iğrâ ve girân-bahâ hedâyâ ile incizâbını sevk ve îmâ edüp mesfûrun ise mevâdd-ı münʿakidenin harfini lisâna almak hayta-i kudretinden bîrûn ve me'mûriyetinden hâric bir lafz tefevvüh etmek vücûduna müstelzim-i mazarrât-ı gûnâ-gûn olup bu hâl ile devleti iğfâl ve katı çok hedâyâ ahziyle mübtelâ-yi garâmet-i emvâl eyledi. Bâlâda beyân olunan garaza mebnî taraf-ı sadrıazamîden mesfûra tertîb-i ziyâfet ve iş bu Zilhicce'nin onaltıncı günü Bâbıâlî'ye celb olunup sunûf-ı nevâziş ile mazhar-ı riʿâyet kılındıktan sonra bâzende ve sâzende ile meclise zînet ve hassateyn-i semʿ ve basara kuvvet verilüp maslahat-ı taʿâm dahi hitâm buldukta hilâf-ı âde sâhib-i devlet tarafından mesfûra bir kabza-i mücevher şemşîr ve bir mücevher piyâle ihdâ ve bir res müzeyyen esb dahi iʿtâ olunup sunûf-ı fevâid ve menâfiʿ ile hânesine râciʿ oldu. Bundan sonra (42a) kapudan paşa ve kethüdâ bey ve yeniçeri ağası ve defterdar efendi ve reisülküttâb efendi vâhiden baʿde vâhid sefîr-i mezbûru daʿvet ile tertîb-i ziyâfet ve dest-âvîz ve hediye ile memnûn-ı lûtf u mürüvvet eylediler. Teshîl-i maslahat-ı Tatar zımnında mesfûra olan riʿâyet ve iltifât ve her taraftan verilen hedâyâ ve atiyyât-ı cüzî ve küllî bir fâideyi müntic olmadığı maʿlûm-ı serîre-şinâsân-ı kâniyât oldu.