Müteveffâ-yı müşârünileyh zamân-ı mütetâvileden berü Bağdad'da vâlî ve sît-i adl ü şecâʿati maʿlûm-ı esâfil ve eʿâli olan Vezîr (40b) Süleyman Paşa, merhûmun memâlîkinden olup bir zamân hızn-ı terbiyede nümâ-yâfte-i vücûd ve giderek ilm-i fürûsiyyet ve edebde dâğ-zen-i kalb-i hasûd olup istiʿdâd ve kābiliyetine nazaran müşârünileyhi her umûruna âşinâ ve giderek dâiresine kethüdâ edüp baʿde'l-vefât hânesinde uzlet-güzîn-i emn ü emân ve eyâlet-i Bağdad, Basra vâlisi Ali Paşa'ya tevcîh olundukta tabʿına girân ve tenevvür-i himmetine feverân-ı tereyân edüp tekāzâ-yı nefs-i emmâre ile fitne-cûyân-ı memleketi tahrîk ve Ali Paşa'nın rişte-i hükûmetini Bağdad'dan tefkîk edüp katline min-akvâi'l-esbâb ve İrân halkıyla ittifâkını şâmil müzevver ve masnûʿ kâğıtlar ihtirâʿ edüp hakkında kizb ü dürûğ-ı irtikâb ve bu bâbda kaleme aldıkları arz u mahzar Sırrı Selim Efendi vesâtetiyle devlete takdîm ve icrâ-yı cûybâr-ı zer ü sîm kılınup Bağdad Eyâleti'ni âkıbet-i nefsine tahsîs ve Basra ve Şehrizor eyâletlerini dahi eyâdî-i bî-gâneden tahlîs edüp vâfir-i zamân kutr-ı Irak'da hükümrân ve encâm-ı kâr Ali Paşa'ya sebkat eden gadr sebebi ile mazhar-ı kahr-ı Cenâb-ı Yezdân oldu. Müşârünileyh salâh-ı hâl ve safvet-i bâl ile müştehir ve Zend Kerîm mâddesine gelince nefs-i Bağdad belki cümleten arz-ı Irak'da dest-yârî-i baht-ı mesʿûdiyle âsâr-ı râhat ve âsâyiş münteşir olup sinn-i ömrü yetmişe mütenâhiz ve ekser-i ömrü fevz ü saʿâdeti hâiz bir düstûr-ı vakūr idi.