İstanbul'a kādı ve seyf-i hükümeti nâfiz ve mâzî olan Alemî Yeğeni Ali Meşreb Efendi taʿdîl-i esʿâr hususunda can-nisâr ve hidmeti makbûl-i sıgār u kibâr olup birkaç gün medd ile mazhar-ı iftihâr olmuşidi. Gurre-i şehr-i Rebîülevvel'de müddet-i örfiyye ve medd-karîn-i inkızâ ve hasbü't-tarîk Hasan Paşazâde Esseyyid Mehmed Said Efendi o makām-ı refîʿa itilâ ve Anadolu kazaskeri İshak Efendi dahi ikmâl-i müddet ve şeyhülislâm-ı esbak İshak Efendi merhûmun necl-i necîbi Şerîf Yahya Efendi yevm-i mezkûrda Anadolu sadâretiyle kesb-i sermâye-i beşâşet eyledi.