Bukʿateyn-i mübareketeyne hasebü't-tarîk kādı nasb olunacaklarda baʿzen müsinn ve ihtiyâr ve azîmete adîmü'l-iktidâr bulunup pâye ile mazhar-ı merhamet olmalarını zarûriyyât-ı vakt-i ilcâ ve giderek bu keyfiyet mahâdîm sınıfına sirâyet ve bilfiil Mekke ve Medîne kudâtına takaddüm ile sebeb-i mağdûriyet oldukları rûşen ve ayân ve nefsü'l-emr hezâr-ı kedd ü taʿab ile müctâz-ı râh-ı Hicâz ve zahmet-keş-i râh-ı dûr ü dırâz olanlara meşakkat-i mâliye ve bedeniyeden ârî kimselerin takaddümünde gadr-i küllî ve musâdere ale'l-matlûb hâletleri nümâyân olup bu sebeble o arâzî-i mukaddeseye hasret-keş-i vusûl olan mevâlî-i izâmın râgıbları (38a) akall-i kalîl ve illet-i teehhür ile mehân ve zelîl olduklarını mutazammın Haremeyn maʿzûllerinden Arabzâde Atâullah Efendi ve Nâfi Efendi tafsîl-i madde ile refʿ-i rıkʿa-i iştikā ve mûmâileyhimânın tevcîh târihinden rütbelerine iʿtibâr olunmak husûsu şeyhülislâm-ı vakt tarafından inhâ ve fî-mâ-baʿd ihrâz-ı pâye edenler bilfiil Haremeyn kādılarından evvel İstanbul kādılığına daʿvâyi istihkāk etmemek bâbında hatt-ı hümâyûn sudûrunu istidʿâ etmekle mûmâileyhimânın tevcîh târihleri muʿteber olup bilfiil Haremeyn kādıları mevcûd iken pâyedâr olanlar İstanbul kādılığına tahsîs olunmamak bâbında evâil-i Saferülhayr'da hatt-ı hümâyûn şeref-sudûr ve bu nizâm, mergūb-ı ulemâ-yı aʿlâmm ekserisine mâye-i hubûr ve sebeb-i efzâyiş-i sürûr oldu.