Muharremülharâm'ın onbeşinci günü Üsküdar kazâsiyle Bıçakçılar imâmı hafîdi Esseyyid Mehmed Fâiz Efendi'nin deşne-i emeli fesân-ı inâyetle teşhîz ve Havâss-ı refîʿa kazâsiyle ser-müneccimîn-i hassa Abdullah Efendi'nin ahkâm-ı zâirçe-i ikbâli tenfîz olundu. Ahmed Paşazâde Veliyyüddîn Bey-efendi geçen sene Mekke Pâyesi memûliyle o tarîk-i meymenet-refîkden acz-âver ve zimâm-ı nevbeti teslîm-kerde-i dest-i âhar olup memûlünden nevmîd ve mahrûm ve hasâret-i tarîk ile beyne'l-akrân muʿâteb ve melûm olmuşidi. Bu sâl-i ferhûnde-fâlde Mekke-i Mükerreme kazâsına dest-i temennî bî-dirâz ve mahdûm-ı endek-sâline ruûs iʿtâsını cenâb-ı fetvâ-penâhîden niyâz edüp bir sene kadar tarîkinde müteehhir olmak cihetiyle ricâsı hayyiz-i isʿâfa vâsıl ve yevm-i zabtından rütbesine iʿtibâr ile Mekke-i Mükerreme kazâsına nâil ve mahdûmunun dahi hâric (37b) ruûsiyle hilâl-i izz ü rifʿati bedr-i kâmil olup Medîne-i Münevvere kazâsiyle Yakub Efendi dahi refʿ-i endûh ve esef ve cânib-i mîrîden muʿîn olan idrârât ile ikisi dahi tahsîl-i mâye-i niʿmet ü teref eyledi.