Tâife-i Levend vüzerâ-yı ʿizâm dâirelerinde ictimâʿ ve fukarâ ve zuʿafânın meʾkûlât ve meşrûbât ve mevcûd olan nukūdların cebr ü ikrâh ile yedlerinden intizâʿ ve baʿzen kapusuz bulunup ebnâ-yı sebîl ve tüccârı nehb ü gāret ve etfâl-i müslimîni bend-i fitrâk-i hidmet eylediklerinden gayri Anadolu'dan Rumeli tarafına mürûr eden vüzerâdan münfekk ve Rumeli kutrunda mecâl-i kerr ü fer mümteniʿ olduğunu cezm ile sû-i sanîʿlerine emr-i mücâzât ihtimâli kulûb-ı kāsiyelerine îrâs-ı zann ve şekk edüp esfâr-ı hümâyûnda dahi vikāye-i nefs ve merkûb kasdıyla gazâ vü cihâddan rû-pûş ve sadme-i aʿdâya adem-i tahammül ile bâʿis-i hezîmet-i cüyûş oldukları sahâif-i kulûb-ı erbâb tecribe ve imtihânda menkūş olduğundan fazla seferler takrîbi ile Anadolu memleketi vüzerâ-yı ʿizâm ve sâir hükkâmdan hâlî olduğuna binâen gürûh-ı mezbûr âteş-i neyistân-ı sâmân-ı fukarâ ve tekâlîf-i gûnâ-gûn ile tahammül-güdâz-ı zuʿafâ olup bu takrîb ile memâlik-i sultânî berhem-zede-i dest-i perîşânî ve tüccâr ve züvvâr adem-i emniyet-i turuk u mesâlik ile reh-beste-i ʿacz ü nâ-tüvânî olduğuna (36b) binâen gûşmâl ve tedîbleri Anadolu müfettişi nasb olunan Vezîr Süleyman Paşa'ya tefvîz ve ihâle ve müşârünileyh dahi baʿzısını ıslâh ve baʿzısını izâle ve bu cihetle fürûmânde-gân-ı zulm ve hüsrân olan zîr-destân bir müddet müşâhede-i rû-yi râhat ile nâil-i dest-mâye-i itminân olmuşlar idi. Müşârünileyh hulûl-i ecel-i mev'ûdiyle vefât ettikte [Mısraʿ]: درون تیره دلان قابل نصیحت نیست müeddâsınca tâife-i mezkûre hirfet-i sâbıkaların istînâf ve tecdîd ve katʿ-ı tarîk ve nehb-i reʿâyâ maslahatını miyânelerinde tekîd eyleyerek o sunûf-ı bî-insâf münteşir-i etrâf ve zuʿafâyi memleketi pâ-zede-i huyûl-i zulm ü iʿtisâf eyledikleri bi'd-defaʿât arz-ı südde-i aʿlâ ve o makūle bugātın ahvâli istiftâ olundukta, “bir tâife ki itâʿat-i sultânîden hurûc edüp bir mahalle ictimâʿ ve baʿzı kimselerin emvâl ve erzâkını gâret edüp sefk-i dimâ etseler mezbûrlar ol fiʿlden rücûʿ etmedikçe katilleri helâl olur" fetvâsı Yahyâ Efendi fetvâsından ihrâc ve etrâfa neşr olunacak evâmir ve ahkâm-ı şerîfeye idrâc olunup bilkülliye refʿ ü istîsâlleri ve tâib ü müstağfir olup sâir gürûha inzimâm irâdesinde olanlar afv ile muʿâmele olunmaları teşdîd ve bu sebeb ile bâ-fazl-ı Rabb mecîd-i cemʿiyetleri perâkende ve tebdîd kılınup ne cânibe teveccüh ettiler ise memerr ü güzer-gâhları mesdûd ve muhârebeye tasaddî edenleri dâire-i hestîden mefkûd olup reʿâyâ ve zuʿafâya dahi kuvvet-i kalb târî olmağla iki nefer levendden yüz kadar reʿâyâ ve hem-nâk iken beş on Türk yirmi otuz levend sütürüki necâğ ve das ile iʿdâm ve meydân-ı (37a) lâf ü güzâfda nefsini be-nâm addeden zalemeyi o makūle zaʿîfü'l-eyâdî kimseler birkaç mâh içinde kem-nâm eyledikleri tesîr-i enfâs-ı halîfe-i rû-yi zemînden münbaʿis bir keyfiyet olduğu bî-iştibâh ve o sınf-ı gümrâh, kesret ile maʿrûf iken müddet-i kalîlede resîde-i hayyiz-i izmihlâl ve tebâh olduğu teyîdât-ı ilâhiyeden maʿdûd bir hâlet idüğü vâreste-i delîl ü gevâhdır. Bağdad ve Şam vâlileri kavm-i mezkûre muhtâc oldukları maʿlûm olduğundan savlet-i seyf-i siyâsetten reh-yâb-ı necât olanlar o taraflara can atup dâirelerine dest-bend ilticâ ve berü taraflara tecavüz ihtimâlâtı olmadığından ihtiyâr-ı sûret-i tegâfül ile nesyen mensiyyen oldular.