Süleyman Efendi devr-i Sultan Mustafa Hânîde kâr-sâz-ı umûr ve Vekîl Osman Paşa kapı kethüdâlığıyla meşhûr olup, hidmetinden hüdâvendigâr-ı sâbık mahzûz ve bu cihetle nezd-i şâhânelerinde nazar-ı iltifât ile melhûz olup, Mustafa Bey-efendi dahi o asırda nedîm ve mazhar-ı nevâziş-i şehriyâr-ı cem-hadîm olup, mukarribân-ı vakt bunların devletine hased ve birer cihetle tekdîr ve taʿzîm olunmalarına enfâs-ı siʿâyeti medd edüp Süleyman Efendi'yi Hotin taʿmîri ünvâniyle Âsitâne'den tebʿîd (36a) ve İbrâil ordusu defterdârı iken iʿdâm ve nâ-bedîd ettiklerinden başka Mustafa Bey'i dahi Niş tarafına nefy ile dil-rîş-i teşvîş eylediler. Süleyman Efendi kapı kethüdâsı olduğu Osman Paşa'ya mîrîden güyâ vâfir akçe istihlâs ve irsâl eylediğini husemâsı îrâd ve Mustafa Bey dahi Kurd Ahmed Paşa'ya kapı kethüdâlık edüp mezâlimine muʿîn olduğu zebân-zed-i ehl-i fesâd olup hülâsa mûmâileyhimâya zâhirde birer cünha isnâd eylediklerinden biri seyf-i gadr ile maktûl ve diğeri belâ-yı celâ ile mahzûl oldu.