Kul kethüdâsı bulunan Turnacızâde Ahmed Ağa sefer esnâsında Hezargrad'da ârâm ve baʿzı hidemâtda istihdâm olunarak katara dâhil ve katʿ-ı menâzil ile kul kethüdâlığı raddesine vâsıl olmuşidi. Mûmâileyhin her taraf ile ihtilâtı vârid ve müteneffislerine olan şiddet-ı irtibâtı yeniçeri ağası olan Mustafa Ağa'nın maʿlûmu olup, belâ-yı istirkāb ile azlini irâde ve sadrıazamın tarafını bulup tebyîn-ı hadd-ı madde etmekle filhâl mûmâileyh zehrâbe-nûş-ı inʿizâl ve inziʿâc ve Hazînedâr Çiftliği'ne ihrâc olunmuşidi. Mûmâileyh sûret-ı zâhirde bir şahvâr u ehl-ı keyf ve bâtında dehâ ve re'yi emzâ mine's-seyf olup leylen esîr ağaya irsâl-ı peyâm ve etrâfa verilecek nakd ve cinsden başka mîrîye hadden efzûn mahlûl takdîm edeceğini ber-vech-ı taʿahhüd ifade ve tefhîm edüp tedbîri muvâfık-ı takdîr ve azlinin ferdâsı yeniçeri ağalığıyla tebşîr olunup Bâbıʿâlî'ye daʿvet ve telebbüs-ı hilʿat ile selefini garîk-ı bahr-ı hayret eyledi.