Mûmâileyh otuz gün kadar nîk ü bed kethüdâlık umûrunu rü'yet Dest-i hicrân eyledi berkende şâh-ı sabrını Ni'met-i vuslatla dil-sîr-i meserret olmadan mefhûmu üzere iş bu Zilhicce'nin yirmiüçüncü günü vefât ve teslîm-i vedîʿa-yi hayât eyledi. Lâleli Mustafa Efendi'nin kâffe-i ahvâli muvâfık-ı mizâc-ı hazret-i sadr-ı ʿâlî olduğuna binâen ferdâsı hamîs günü Bâbıʿâlî'ye daʿvet ve sadâret-i uzmâ kethüdâlığı için ilbâs-ı hilʿat olundu. Müteveffâ-yı mûmâileyh Ankara kasabasında mütevellid olup terarʿu'-ı eyyâm-ı şebâb ile Âsitâne'ye gelüp baʿzı mahalle intisâb ve giderek kethüdâ bey kalemine müdâvemet ve baş halîfe ve kitâbet hizmetleriyle kesb-ı şöhret edüp seferden mukaddem kitâbetden dûr ve küçük evkāf mansıbı ile makhûr olmuşidi. Bidâyet-i seferde ke'l-evvel kethüdâ beye kâtib ve nâ'il-i eʿazz-ı metâlib olup Tevfîkî Ali Paşa sadâretinde maʿzûl ve Halil Paşa sadâretinde Anadolu muhâsebesiyle çeşm-ı ibtihâcı mekhûl kılınup, baʿdehû baş muhâsebe ve büyük rûznâme ve defter emâneti ile mükerrem ve Ordu-yı hümâyûn Âsitâne-i saʿâdet'e geldikte mükerreren defter emânetinde ve çok geçmeden kethüdâlık hidmet-ı refîʿasında müstahdem olup zikr olunduğu vech üzere henüz vuslat-res-i şâhid-merâm olmadan fevt ve giriftâr-ı ser-pençe-ı mevt oldu. Mûmâileyh safdil ve uʿcûbe-kıyâfet ve sagīrü'l-cüsse ve büzürg-himmet sahre-ı sammâdan istihrâc-ı revgana kādir yaʿnî dâd u dihişde akrânı nâdir idi. (35b)