Yeniçeri Ağası Mustafa Ağa sadrıazam hazretlerini Ağakapısı'na daʿvet ve tertîb-i çeşn ü ziyâfet edüp istimâʿ-ı egānî-i sâzende ve hânende-gân ile ruha kuvvet ve müşâhede-i bâzendegân tâze rûbân ile kalbe neşât ve ferhat verildikten sonra bast-ı mevâid ü ferş-i hân ve tenâvül-i etʿime-i mütenevevviʿü'l-elvân akabinde ağa-yi mûmâileyh huzûr-ı sadrü's-sudûr nisâr-ı tefârîk u tuhaf ve takdîm-i (34a) nutef ü turef edüp bu mukābelede dûş-i istîhâli ferve-i semmûr ile tezyîn ve makāmında istikrâr vaʿdesiyle te'mîn olundu. Medîne-i Münevvere sükkânından Kumkumcu Mehmed ve Kandilîzâde Abdurrahim yek-dil ve yek-cihet ve ehl-i tayyibeyi izrâra cesâret eylediklerinden gayri Hazîne-i Ravza-i Mutahhara'ya dest-i hıyâneti itâle ve birkaç nefer kimseyi bi-gayr-i hak izâle eyledikleri bâ-arz u mahzar südde-i aʿlâya inhâ ve o kutr-ı eşrefte bu makūle erbâb-ı ihânetin bekāsı hilâf-ı rızâ olduğuna binâen şeref-yâfte-i sudûr olan emr-i cihân-mutâʿ iktizâsiyle merkūmân ve hevâlarına ittibâʿ edenler dûr-bâş-ı tevbîh ile taʿzîr ve alâ-tarîki'n-nefy diyâr-ı baʿîdeye tesyîr olundu. Şeyhülislâm efendi bu esnâda evlâd-ı encâb-ı ulemâ ile birkaç nefer erbâb-ı fehm ve zekâya rüuslar iʿtâ edüp imtihânda idâre-i dersden aczi zâhir ve bakiyye-i imtihân iddiʿâsiyle vakt-i fırsata nâzır olan baʿzı talebe nâ-sezâyi makām baʿzı kelâm arz-ı hâle derc ile merfûʿ-ı atebe-i şehriyâr-ı vâlâ-makām etmişler idi. Müşârünileyh bu kaziyyeden müsteşʿir ve hakkında vukūʿ-ı iğbirâr ihtimâliyle mütekeddir olduğu aks-endâz-ı mir'ât-i tabʿ-ı pâdişâhî olup derûnunda izâle-i hadşe ve evhâm irâdesiyle hatt-ı hümâyûna mashûb tarafına bir sevb bol yenli ve şık kürk irsâl ve ol vechile mutayyebü'l-bâl kılındı. Sulb-i pâk-i hazret-i tâcdârîden zerârî-i mütetâbiʿi'z-zuhûr me'mûl-i erbâb-ı hads ü kıyâs ve bu esnâda Harem-serây-i hümâyûnda hâmil-i âvâzesi dahi sâmiʿa-res-i umûm-ı nâs olduğuna binâen eshâb-ı merâtib ü bedâyiʿ ve erbâb-ı hıref ve sanâyiʿ (34b) donanma levâzımâtım tehiyye ve âmâde ve zuhûr-ı vilâdete dîde-i intizârı güşâde ve vazʿ-ı haml hengâmında bir cesed-i bî-rûh zuhûr ve enderûn ve bîrûn halkını bî-şuʿûr edüp kable'l-istihlâl namazına mesâğ-ı şerʿî olmayup hemen resm-i taʿziye icrâsiyçün sadrıazam ve şeyhülislâm efendi hazerâtı ve sâir huzûru lâzım gelenler Enderun-ı hümâyûn'a şitâb ve baʿzı mukaddemât-ı müselleme ile şehriyâr-ı sütûde-etvârı tesliyet-yâb ettikten sonra o gonçe-i nâ-güşûde-i gülzâr-ı saltanatı Vâlide Câmiʿi'nde defîn-i taht-ı zemîn eylediler.