Beyşehri mutasarrıfı Ahmed Paşa re's-i hudûddan Moskov elçisini alup muhâfaza ederek Âsitâne-i saʿâdet'e îsâl ve hidmet-i pesendîde-i şehriyâr-ı cemîlü'l-fiʿâl olduğundan Rumeli Beylerbeyiliği ile nâ'il-i mükâfât ve mansıbı Hanya'ya tahvîl ile mazhar-ı iltifât oldu. Mahrûse-i Bursa'da Kādirî Tekyesi'ni âbâd ve icrâ-yı âyîn ile terkīk-i kulûb-ı ehl-i sedâd eden Eşrefzâde Abdülkadir Efendi'nin salâh-ı hâli Şeyhülislâm Efendi tarafından sâmiʿa-i hümâyûna resîde ve iktibâs-ı envâr tecelliyâtiyle bi'l-müşâhede, tasfiye-i kalb ü tenvîr (31b)-dîde etmek arzûsu tabʿ-ı şâhâneye hâlide olup ikrâm ve iʿzâz ile ihzârı bâbında hatt-ı hümâyûnları keşîde kılınmış idi. Şeyh-i mûmâileyh Âsitâne-i saʿâdet'e pâyendâz-ı vusûl ve leyle-i Berât'da şeref-i lakaba-i tâcdâriyle nâ'il-i eʿazz-ı me'mûl olup şehriyâr-ı kerâmet-disâr muhatabât-ı hakā'ik-âsârlarından mahzûz ve şeyh-i mûmâileyh nazar-ı âtıfet ve inâyetleriyle melhûz olup atâyâ-yı vâfire ile sahîfe-i hâtırı tezhîb ve bir sevb kākum kürk ilbâsiyle iʿzâz ve tatyîb olundu. Şeyhülislâm-ı sâbık İbrâhîm Bey-efendi bundan akdem Çırağan Sâhilhânesi'ni taraf-ı pâdişâhîden ber-vech-i istimlâk niyâz ve iʿrâz ve redd-i muhâlif tabʿ-ı şehriyâr-ı mekârim-perdâz olduğuna binâen niyâz-ı karîn-i isʿâf ve sâhilhâne-i mezkûre müşârünileyh tarafından ihtitâf olunmuşidi. Baʿde'l-azl mahall-i mezkûru makām ve şitâ kudûmiyle Sadefçiler'de iştirâ eylediği Acem Ali Hânesi'nde ârâm etmek kasdında olduğunu şeyhülislâm efendi cenâbları istimâʿ edüp baʿzı mülâhazaya mebnî Âsitâne'ye gelmesini tehcîn ve sâhilhâne-i mezkûrede ikāmetinin evleviyetini tebyîn etmekle tarafına ol vechile irsâl-i nüvîd ve Âsitâne'den bu vechile tebʿîd olundu. Şehr-i Ramazanda Huzûr dersi Hüdâvendigâr-ı sâbık Sultan Mustafa Han sît-i aleyh-i şeâbib-i rahmetü'r-rahmân hazretlerinin îcâd-gerde-i şâhâneleri olup bu eser-i cemîle-i iktidâ, sebeb-i celb-i menâfiʿ-i dünyâ ve ukbâ olmak maʿnâları birâder-i büzürg-vârları olan hidîv-i zamânenin kalb-i eşreflerinde hüveydâ olmağla müderrisîn-i kirâmdan yetmiş kadar erbâb-ı fazl ü hüner alâ-tarîki'l-münâvebe (32a) huzûr-ı hümâyûnda müdârese-i ilm-i tefsîr ve hâle münâsib vaʿz u tezkîr ve her birine alâ-hiddetin surreler ihsân ve teshîl-i masârif-i şehr-i Ramazan kılındı. Mâh-ı mezbûrun sekizinci gecesi Galata'da Bağcı Mahallesi'nde vâkiʿ kefere hânelerinden birinde âteş-i cevvâle zebâne-keş-i iştiʿâl ve buyût u dekâkînin birbirine ittisâli me'mûrların saʿyini ibtâl edüp, sekiz saat kadar o âteş-i pür-şerer katı çok kimseyi mübtelâ-yı envâʿ-ı zarar edüp, nâgâh cenâb-ı perverd-gâr kuvve-i kāhiresin izhâr ve itfâ-yı sûret-i nâr eyledi. Muntasıf-ı Ramazan'da Hırka-i Şerîfe alâ-lâbis-hâ elf-i tahiyyeyi ziyâret resm ü âdet olduğuna binâen huzûrları muʿtâd olan erkân-ı saltanat yevm-i mezkûrda o yâdigâr-ı hazret-i risâlet-penâhîyi mâlide-i vecne-i zarâʿet edüp dergâh-ı âlî ocaklarına taksîmi resm-i dîrîn olan baklava dahi rûz-ı merkūmda tevzîʿ ve iʿtâ ve tavâif-i mezkûre hân-ı vâsiʿü'n-nevâl-i şâhâneden dilsîr-i niʿam-ı evfâ kılındı. Kapudan-ı Deryâ Hasan Paşa Donanma-yı hümâyûn ile Akdeniz'e şirâ-güşâ olmuşidi. Donanma-yi Hümâyûn'u mashûben-bi's-selâme Âsitâne-i saʿâdet'e îsâl ve mersâ-yi Tersâne-i âmire'ye idhâl ile hizmetin ikmâl eyledi.