Karaman Vâlîsi Vezîr Süleyman Paşa Anadolu teftîşi ile bir müddet heybet-endâz-ı kulûb-i eşkıyâ olup mansıbı olan Konya'ya avdetinde zaʿf-ı pîrî tesîriyle mâh-ı mezkûrun muntasıfında azm-i dâr-ı bekā edüp, mahlûl olan mansıbı ile Kayseriye Mutasarrıfı Çerkes Paşa nâil-i sürûr-ı bî-intihâ oldu. Müteveffâ-yı müşârünileyh şüceʿân-ı vüzerâ-yı izâmdan (32b) âkil ve müdebbir, hâzım ve mutabassır tehdîdini îkāʿa kādir, zâtında bahadır bir vezîr idi. Ordu-yı hümâyûnda perde-ber-endâz-ı hadd u edeb olan gümrâhları cild-i evvelde tafsîl olunduğu vech üzere seyf-i siyâsetle te'dîb ve cüsselerini ilkā-yı kalîb eylediği Kuyucu Süleyman Paşa nâmiyle tezkâr olunmasına sebeb olduğundan başka Âsitâne-i saʿâdet kā'immakāmlığında dahi muhtekirân rüzgârı tazyîk ve tesmîr ve baʿzısını tağrîb ve baʿzısını tedmîr eylediğini nev-devletân-ı vakte hevl-nâk ve muhavvif görülüp sıyânet-i nefs ü mâl ve himâyet-i câh u ikbâlleri kasdiyle hakkında pâdişâha si'âyet ve Anadolu teftîşiyle azl ü izʿâcına mübâderet eylediler. Bu me'mûriyette dahi devlete izhâr-ı hidmet-i pesendîde yaʿnî giyâh-ı hod-reste-i vücûd-ı bugātı dâs-ı siyâsetle direvîde edüp kadri bilinmedik bir vezîr ve merâtib-i aliyyede istihdâma cedîr bir pîr-i sütûde tedbîr idi. Mısır Vâlîsi Arabgirli Vezîr İbrâhim Paşa bir müddetten beri hücûm-ı ilel ü eskām ile bî-zâr ve azm-i hıyâbân-zâr-ı dârü'l-karâr eylediği haberi vâsıl-ı der-i devlet-medâr olduğuna binâen Mısr-ı zâtü'l-ehrâm ile Aydın muhassılı sadr-ı sâbık İzzet Mehmed Paşa mazhar-ı ikrâm olup, münhal olan muhassıllık ile Mora muhassılı Hazînedâr Ali Paşa minnetdâr ve Mora muhassıllığı ile sâbıka Kefe seraskeri olup bir zaman kayd-ı esre giriftâr olan Vezîr Silahdâr İbrâhim Paşa nâil-i mesâr oldu. Müteveffâ-yı müşârünileyh rikâb-ı hümâyûn hizmetlerinde isbât-ı vücûd ve vezâreti hâlinde dahi efrâd-ı vüzerâdan maʿdûd olup hûşyâr ve müstakīm (33a) ve tenû-mend ü cesîm bir vezîr-i bî-nazîr idi.