Devleteyn tarafından taʿyîn olunan sefîrler re's-i hudûdda mübâdele olunup Rusya elçisi Repnin General tayy-i merâhil ile Büyükçekmece'ye vâsıl olduğu mihmândârı tarafından ifâde ve dîvân tercümânı istikbâline firistâde kılınmışidi. Hâlâ çavuşbaşı olan Mehmed Ağa muttakī ve mutasallib bir kimse olup mesfûrun yemîn ü yesâr arbedesinden ve istihfâfa dâ'ir muhtemelü'l-vukūʿ olan baʿzı etvârından vesvese edüp sûret-i temârûzda çâr-bâliş (31a)-nişîn-i âh u enîn ve Maltepe'de tertîb olunan yemeklik akabinde alay ile mesfûru iʿdâd olunan hânesine tenzîl içün çavuşbaşı maʿzûllerinden Mehmed Said Efendi taʿyîn olunmuşidi. Elçi-i mesfûr devletinde muʿteber ve nâmdâr generallerden ve seferde vâkiʿ cemîʿ-i hurûbda bulunmuş eşrârdan sâhib-i nehvet ve nefsini beğenmiş bir şahs-ı bed-tıynet olup keyfiyyet-i sâlifeyi ʿamd ü kasda haml ile bilfiʿîl çavuşbaşı ağanın maʿiyetini taleb-kâr ve istikbâline me'mûr dîvân tercümânını istisgārdan başka yemeklik için tertîb olunan taʿyînâtı istihkār eylediği mütehakkık oldukta bâdî-i emirde mesfûru tenfîr revâ-dâşte-i erbâb-ı rey ü tedbîr olmadığına binâen Said Efendi'ye çavuşbaşılık vekâleti tevcîh olunup taʿyînâtına dahi baʿzı ecnâs zamm ve ilhâk olunarak irzâ ve ber-vech-i muharrer Maltepe'de tertîb olunan yemeklik resmi icrâ ve Galata'da âmâde kılınan konağa alay ile götürülüp ikāme ve îvâ olundu.