Sudûr-ı kirâmdan İrânîzâde Mehmed Esad Efendi bundan akdem nefy olunan Tatarcık Abdullah Efendi'nin derece-i ilm ü hünerine vâkıf ve kayd-ı nefye ibtilâsı nefsâniyet-i erbâb-ı garazdan neş'et ettiğine dânâ ve ârif olup ıtlâkını cenâb-ı fetvâ-penâhîden ricâ vü niyâzı hayyiz-i isʿâfa resâ olup kayd-ı gurbetten âzâd ve telâkî-i iyâl ü evlâd ile ber-murâd oldu. Hamise raddesini zamân-ı karîbde ihrâz eden imâm-ı sânî bir müddet tevkīf olunduğuna tahammül edemeyüp şikâyeti mutazammın verdiği arz-ı hâl hakkında müstelzem-i iğbirâr ve infiʿâl olup Beykoz'a alâ-tarîki'n-nefy mübâʿade ve hakkında mütetâbiʿi'z-zuhûr olan niʿmetin hakkını edâda kusûr şeâmetini müşâhede eyledi. Bostancıbaşı Halil Ağa mübtelâ-yı sû-ı mizâc olduğundan mâh-ı mezbûrun yirmibeşinci günü ihrâc ve yerine Haseki Ağa idrâc olundu.