Taraf-ı hümâyûna cihet-i mâ ile ihtisâsı olan Ahmed Nazîf Efendi mutasarrıf olduğu arpa emânetinden hazzını istîfâ ve âhar mansıba irtikāsını ricâ edüp Cumâdelâhire gurresinde başmuhâsebecilik rütbesini ihrâz ve arpa emâneti ile re'îs-i sâbık İbrâhîm Münîb Efendi ve matbah-ı âmire emâneti ile kethüdâ-yı sâbık Ahmed Resmî Efendi kesb-i şeref ve imtiyâz eyledi. Sadr-ı sâbık Silâhdâr Mehmed Paşa Bosna Eyâleti'ne tâlib ve selefine dâd ü dihişde gâlib olup mâh-ı mezbûrun yedinci günü Bosna Eyâleti yed-i gâlibesinden intizâʿ ve selefi sadr-ı esbak Halîl Paşa'ya Selânik Sancağı istişfâ olundu. Baʿzı menâsıb-ı ilmiyyenin hengâm-ı tevcîhi takarrüb etmekten nâşî yevm-i mezkûrda Yenişehir Fenâr kazâsı şeyhi Mollazâde Ahmed Atâullah Efendi'ye ve İzmir Kazâsı Feyzullah Efendizâde Mehmed Refîʿ Efendi'ye ve Selânik Kazâsı Haremeyn Müfettişi Hammâmî Ali Efendi'ye ve Galata Kazâsı Osman Molla damadı İbrâhîm Bey'e tevcîh ve ihsân olunup bu tevcîhâttan hâsıl olan silsileden müderrisîn-i kirâm katʿ-ı merâtib ve menâzil ve tayy-i tavâmîr-i (30a) merâhil eyleyerek lebrîz-i câm-ı sürûr ve ibtisâm oldu.