Bayındır voyvodası olan İvaz Mehmed Ağa an-asl Aydın taraflarında sekbanlık ile meşhûr ve giderek İzmir voyvodalarına bölükbaşı olmakla kesb-i kuvvet ü zûr edüp, ber-takrîb gümrükçü İshak Ağa tarafına tevessül ve arz-ı merâm ve vâsıtasıyla baʿzı mukātaʿât iltizâm ve tevsîʿ-i dâire ile tahsîl-i dârât u ihtişâm etmişidi. Uhdesinde olan iltizâmâtın fâizleri masrûfâtına vefâ etmediğinden zulm (28b) ü iʿtisâfa mecbûr ve reʿâyâ ve berâyâyı bu vesîle ile evtân-ı me'lûflerinden dûr edüp baʿzı tenbîhât ile enf-i şâmihi irgām ve semt-i salâha meyl ü rükûnu iʿlâm olundukta kapucubaşılık ile câme-i rifʿati tezyîn ve sefer vaktinde İzmir muhâfazasına taʿyîn olunmuşidi. Mûmâileyh İzmir voyvodası bulunan Kara Osmanzâde el-Hâc Ahmed Ağa ile muhâreşe ve giderek birbiriyle ağâz-ı müşâcere ve münâveşe edüp İzmir'i pâ-zede-i evbâş ve levendât ve emvâl-i tüccârı gasb-gerde-i erbâb-ı gārât eylediği sâir mezâlimi ile nigâşte-i sahîfe-i yâd-ı devlet ve tertîb-i cezâsı mevkūf-ı vakt-i vüsʿat kılınmışidi. Sefer gavâili ber-taraf ve meşâgil-i devlet kesb-i sûret-i ahaff eylediğine binâen merkūmun esbâb-ı inʿidâmı tertîb ve Kapudan-ı Deryâ Vezîr Hasan Paşa üzerine taʿyîn ve tesrîb olunup maʿiyetine me'mûr asâkir-i müctemiʿa ile mukîm olduğu Bayındır'a ilgār ve merkūm makābeleden âciz olup Tire kazâsı etrâfında geşt ü güzâr eder iken akab-gîrler yedine giriftâr ve birkaç nefer bölükbaşısı ile kantara-i seyfden imrâr olunup rüûs-ı maktūʿaları Âsitâne'ye getirilüp mevzûʿ-ı ibret-gâh-ı eşrâr kılındı.