Kabâil-i Tatar ve Kırım halkının ekseri zarûriyyü'l-vukūʿ olan serbestiyet ve teslîm-i kılâʿ maddelerinden mahzûz olmayıp bu mevâddı ılgā matlûbları olduğuna binâen söz sâhibleri bir mahalle gelüp bu madde-i müşkileyi miyânelerinde meşveret ve Sâhib Giray Han'ı dahi meclislerine daʿvet etmişler idi. Madde-i serbestiyet müşârünileyhin zamânında nizâm bulmuş olduğundan dâire-i cemʿiyetlerine duhûlden ictinâb edüp bir sefîne ile Âsitâne-i saʿâdet'e vârid ve mesned-i hânî hâlî kalmamak garazına mebnî o havâlide bulunan Devlet Giray Han bi'l-intihâb süllem-i hânîye sâʿid olup bu keyfiyâtı Devlet-i aliyye'ye ifâde için ulemâ ve mirzayândan birkaç nefer kimseyi bu defʿa dahi der-i devlet-medâra irsâl ve tafsîl-i hâl etmişler idi. Erkân-ı saltanat bu madde-i mümteniʿü'l-husûl için tekrâr akd-i encümen-i meşveret edüp "Tatar kavmi ve Kırım halkı mülâhaza-i fevâʿid-i ʿamîme ile fî-bâdi'i'l-emr serbestiyete kāil ve devleteyn muhârebe üzere iken miyânelerinde nihânî teʿâtî-i senedât ile ʿalâ-zuʿmihim defʿ-i gavâil etmişler idi. Giderek sûret-i serbestiyyet mizâclarına muvâfık ve me'mûl ve ümniyelerine mutâbık gelmeyüp feshini istidʿâ ve Devlet-i aliyye'yi müceddeden envâʿ-i tekellüfât ve meşakka mübtelâ edecekleri hüveydâ olduğundan başka iddiâları münâfî-i şurût-ı musâlaha ve fesh-i şurût-ı mûcib-i muhârebe ve mükâfaha olduğu mukarrer ise dahi kavm-i mezkûrun derece-i iltimâslarını sedd-i ye's ü hirmânlarını mûcib olacağı maʿlûm-ı erbâb-ı kabûl ve redd olup şimdilik bir mahalde îvâ ve Rusyalu'nun büyük elçisi vürûdunda bu maslahatın müzâkeresine şürûʿ ve usr ü yüsr-i madde vicâhen maʿlûmları olmak emr-i maʿkūldür" deyü ehl-i meşveretin (27b) cümlesi yek-zebân-ı vifâk ve Sâhib Giray Han dahi Devlet-i aliyye'yi melce ve penâh ittihâz eylediğine binâen matlûbu olan mahalde ikāme olunması zımnında kâr-bend-i ittifâk olmalariyle re'y ü tedbîr-i vükelâ-yı devlet muvâfık-ı re'y-i şehriyâr-ı gerdûn-rifʿat olup mebʿûslar bir mahalde iskân ve Sâhib Giray Han dahi iltimâs üzere Tekfur-Dağı'na gönderilüp levâzım ve havâyicleri temşiyeti ile ferhân kılındılar.