Şam'da müddet-i medîdeden berü vâli ve hemyân-ı iktidârı nükūd-ı mütevâfire ile mâlı olan Osman Paşa vefât eyledikte oğlu Mehmed Paşa pederinin emvâli tarafına i'tâ ve rütbe-i vezâretle kadri i'lâ olunduğu takdîrde üç bin kise bedel ile Devlet-i aliyye'ye izhâr-ı hidmet eyleyeceğini inhâ ve taʿahhüdü üzere vezâret ile Haleb ve mütevâliyen Rakka ve Sivas eyâletleri gibi kesîrü'l-cedvâ menâsıb ile kayrılmışiken ancak üç yüz kise teslîm ve bâkīsi Şam Eyâleti'nin tevcîhine ta'lîk ile pey-der-pey der-i devlet-medâra tahrîrât takdîm etmişidi. Hadâset-i sinn ü kühûlet sebebi ile umûr-ı haccı idârede liyâkati ma'dûm ve farz-ı muhâl ile Şam tevcîh olunsa edâ-yı deyn eyleyeceği mevhûm ve bâ-husûs bu mutâlebe-i müteʿâkibesi Şam vâlisini tebrîd ve rü'yet-i umûrdan teb'îd etmekle kayd-ı vezâreti terkîn ve emvâl ü eşyâsı kabz olunmak zımnında Kapıcıbaşı Sâdık Ağa mübâşir taʿyîn olunup mübâşir-i merkūm, müşârünileyhin emvâlini zabt ve kendisini Sivas Kalesi'ne vazʿ edüp Âsitâne-i saʿâdet'e ricʿat ve makbûzu olan emvâli mahalline teslîm ile edâ-yı hidmet eyledi. Adana vâlisi Kapıcı Vezîr Süleyman Paşa Adana'dan istiʿfâ ve Karaman vâlisi olan Çatalcalı Ali Paşa'dan ahâli iştikâ etmekle Karaman Eyâleti Süleyman Paşa'ya ve Haleb Eyâleti Çatalcalı Ali Paşa'ya ve Trablusşam Eğribozlu Vezir Mehmed Paşa'ya tevcîh ve bir an akdem mansıblarına lühûkları emr ü tenbîh olundu.