Manastır'a altı saat mesâfede vâkiʿ Florina'da sâkin Musli nâm şakī haşyet-i hakkı hâtırından ihrâc ile fukarâ ve zuʿafâya zulm u taʿaddîsi yevmen fe-yevmen kabûl-i terakkī edüp birkaç kasaba ve karye dest-i tetâvülünden vîrân ve baʿzıları celâ-yi evtân beliyyesiyle perîşân oldukları Rumeli vâlisi Vezîr Dağıstânî Ali Paşa'ya inhâ ve beyân olunup ber-takrîb Manastır'a ihzâr ve husemâsıyla terâfuʿ-ı şerʿ ve sübût bulan cerâ'im ve evzârına binâen ser-i nuhûset-eseri katʿ olunup sûret-i hâli mübeyyin tahrîrât müşârünileyh tarafından vâsıl-ı südde-i eşref-i selâtîn-i kâ'inât oldu. Düzce kasabasında mütemekkin Araboğlu nâm küştenî harâb-sâz-ı sâmân-ı fakīr ve ganî olduğuna (25a) binâen hakkında birkaç defʿa emr-i âlî sâdır ve füshat-i ecel sebebi ile bu âna dek me'mûrlar katline zâfir olmamışlar idi. Bolu voyvodası Hacı Ahmed Ağa bir mikdâr asker ile bu defʿa üzerine varup, yârâ-yi mukāvemeti mefkûd olduğundan Ankara semtlerine firâr ve o havâlide vâkiʿ cibâl-i şâhikaya istizhâr edüp bir müddetten sonra Düzce etrâfında geşt ü güzâr eylediği voyvoda-i mûmâileyhe ihbâr olundukta filhâl ilgār ve merkūmu küşte-i seyf-i tâb-dâr edüp ser-i maktûʿunu der-i devlet-medâra tesyâr eyledi. Maraş Eyâleti'nde Mandallu ve Kılıçlu aşîretleri aşâ'ir-i kesîretü'ş-şuʿûb ve kabâ'il-i me'lûfetü'l-hurûbdan olduklarına binâen öteden berü zabt u rabtlarında vulât ve hükkâm acz-âver ve bâ-husûs sâl-i çendînden berü o havâli vüzerâdan hâlî kaldığından etrâf ve eknâfa itâle-i dest-i hasâr u zarar etmeleriyle te'dîbleri emr-i mendûb, belki resîde-i derece-i vücûb olup bu irâde Maraş vâlisi Vezîr Abdullah Paşa'ya ifâde ve sırren tarafına emr-i âlî firistâde olunmuşidi. Müşârünileyh dâiresi halkını ve baʿzı aşâiri istishâb ve meştâları semtine mânend-i berk-ı hâtıf-ı şitâb edüp eşkıyâ-yı merkūme bu savlet-i nâgeh-zuhûrdan tersân ve bir fırkası Çobanoğlu ve fırka-i uhrâsı Abdülfettahoğlu yanına varup pinhân ve bâkīsi saʿbü's-sülük cibâle gürîzân olup mukāvemete kudret iddiʿâsında olanlar muhârebeye mübâşeret ve müşârünileyhin ednâ hücûmuna adem-i tahammül ile firâr ve gaybet ve müşârünileyh sâlimen ve gānimen avdet eylediğini inhâ ve te'dîbât-ı mâ-yelîklarını icrâ eylediğini der-i devlet-medâra arz ve inhâ (25b) eyledi. Eyâlet-i Bosna'da vâkiʿ Lügoşte Kalesi'nde dizdâr-ı sânî olan Yahya ve refîki Zeynel umûr-ı serhaddi muhtel ve fukarânın urve-i râhatlarını münhal eyledikleri, vâlisi sadr-ı esbak Halil Paşa'ya maʿlûm olup âsâyiş-i ibâd ve refʿ-i ihtilâl dâʿiyesiyle merkūmları izâle eylediğini mübeyyin der-i devlet-mekîne arz-ı kıbâle eyledi. Bergama voyvodası ve aʿyânı olan Sağıncılı Veli an-asl Yörük tâ'ifesinden Sağıncı Karyesi'nde tavattun ve Bergama voyvodası Kocaoğlu Elhâc İsmâʿil Ağa'nın hizmetinde temekkün edüp baʿde'l-vefât oğlu Mehmed Ağa'ya dahi hidmet ve ol dahi vefât ettikte oğlu İbrâhîm Ağa'nın umûrunu rü'yet eyler idi. Ancak mezbûr idâre-i umûrdan bî-haber ve hevâ vü heves ile meşgûl bir şahs-ı der-beder olup merkūm Veli dâirelerinde emekdâr olmak takrîbiyle zimâm-ı umûr-ı kazâyı yedîne teslîm ve hânesinde fârigü'l-bâl ikāmet ile eyyâm ve sâʿatini lehv ü tarabe taksîm edüp merkūmun gaflet ve lezzât-ı dünyâya inhimâki muʿtemedi olan Veli'nin derûnunu ifsâd ve yerini zabt ve hânmânını berbâd etmeye ictihâd edüp dâiresinde olan halkı ıtmâʿ ile emrine râm ve merkūm Veli Ağa'yı o nemek-be-harâm on kadar bölükbaşısı ile iʿdâm ve tarafına müteʿallik ricâl ü nisvânı nehb ü gāretle fakīr ü gümnâm eylediğinden gayrı Araboğlu Dâmâdı Abdülfettah'ın mâ-melekini yağma ve menkûhasını nefsine istihlâs ile mutasaddî-i kâr-ı nâ-bercâ olduğundan mezbûr mâ-melek ve zevcesin alıp İzmir'e firâr ve şakī-i mezkûr ceyş-i mevfûr ile İzmir'e karîb mahalle geldiğini (26a) Abdülfettah teyakkun ile zevcesini İzmir'de terk ve Kütahya'ya gelüp muntazır-ı encâm-ı kâr olmuşidi. Mezbûr Veli ahâli-i İzmir'i ihâfe ve terhîb ve merkūmun zevcesini vermedikleri hâlde hâric-i İzmir'de vâkiʿ mezâriʿ ve buyûtu ifsâd ve tahrîb eyleyeceğini inhâ ve ihtiyâr-ı ehven-i şerreyn iktizâsiyle mezbûreyi yedine i'tâ ve nikâh ale'n-nikâh gayr-i câiz olduğunu her ne kadar ifade ettilerse dahi kelâm-ı ma'kūllerini dinlemeyüp irtikâb-ı sefâh eylediği ve bu maddelere müşâbih nice mezâlim ve taʿaddiyâta cesâret ettiği ma'lûm-ı kâr-fermâyân-ı devlet olup vücûb-i izâlesi atabe-i aliyye-i cihândâriye ifâde ve katli irâde olunduğuna binâen Anadolu vâlisi Vezîr Abdî Paşa üzerine taʿyîn ve Bergama'ya tahassun ve birkaç gün harb ü cidâl ile iştigāl ettiyse dahi mukāvemete kudreti olmadığı taʿayyün edüp zevcesini i'dâm ve firâra âğâz ve eyâdî-i akab-gîrânda ser-i nuhûset-eseri kâlbüd-i bedenden ifrâz olunduğu haberini müşârünileyh arz-ı atabe-i erbâb-ı hâcet ve niyâz eyledi.