Zümre-i müderrisînden Mehmed Tâhir Efendi neşve-dâr olduğu hâlde Bahâriye pîşgâhında vâkiʿ çayırdan mürûr eder iken nigeh-bânlarının menʿe tasaddîleri mollayı bî-huzûr edüp giderek muʿârazaları müşâtemeye ve müşâtemeleri mudârebe ve müsâdemeye müncer ve mûmâileyhi keyfiyyet-i câm-ı teşcîʿ ve zûr-âver edüp hemen miyân-bendinde âmâde olan bıçağını dest-âver-i insilâl ve yanında olan âdemlerine emr-i muʿâveneti tenbîh ile bostancıları önüne katup nâr-ı hâmîde-i arbedeyi işʿâl (24b) ve molla-yı mezbûrun asâlet ve nebâleti maʿlûm olduğundan bostancılar âlât-ı müdâfaʿa istiʿmâlinden ictinâb ve bu hâl ile iki üç nefer bostancıyı cerh-i elîm ile üftâde-i deşt-i iztırâb edüp keyfiyet resîde-i semʿ-i eşref-i pâdişâhî ve te'dîbi müfevvez-i re'y-i fetvâ-penâhî kılınup, baʿde'l-keşf ve'l-muʿâyene efendi-i mûmâileyh Gelibolu'ya iclâ ve iki ay mürûrundan sonra bostancılar elem-i cerhden rehâ ve birâderi sadr-ı Rûm-ı sâbık müteşebbis-i dâmen-i recâ olduğuna binâen kayd-ı gurbetten ihlâ olundu. Âsitâne'ye ricʿatinde fî-mâ-baʿd evbâş ve erâzile mahsûs olan reftâr-ı nâ-hem-vârdan dest-şû-yi ferâğ olmadığı hâlde eşedd-i takrîʿ ile te'dîb ve nefy-i ebed ile taʿzîb olunacağı şeyhülislâm efendi tarafından ifhâm ve esb-i serkeş ru'ûneti bu pend-i dil-pesend ile ilcâm olundu.