Kudemâ-yi ricâl-i devletten bilfiʿil tevkîʿi olan Abdullah Efendi pîr-i gühen-i sâl ve zaʿf-ı kuvâ ile bî-mecâl olmaktan nâşî mâh-ı mezkûrun yirmiyedinci günü tekmîl-i enfâs-ı hayât ile dâr-ı âhirete pâ-nihâde-i irtihâl ve münhâl olan mansıbı ile Atıfzâde Ömer Efendi münşerihü'l-bâl oldu. Mûmâileyh hüsn-i hulk u seciyyet ile nâm-âver ve cevdet-i hatt u tezyîn-ı hurûfda İbn Mukle'ye beraber muʿtemed ve emîn ve riyâset ve sâir menâsıbda sadâkati tecrübe olunmuş bir pîr-i cihân-bîn idi. Cidde vâlisi Vezîr Halîl Paşa dahi mâh-ı mezbûr evâhirinde hulûl-i ecel-i mevʿûdiyle vefât ve gadd-ı basar-ı hayât edüp münhal olan mansıbı Yenişehirli Vezîr Osman Paşa'ya bundan akdem tevcîh olunduğuna binâen bir an akdem Bender-i Cidde'ye luhûku emr ü tenbîh olundu. Müşârünileyh Çorlu kasabasında neşv ü nemâ bulup Nazm: Gidelim der ki vâlâ-yi şeh-i devrâna Şemʿ-i ikbâline biz de olalım pervâne. terânesiyle Âsitâne-i saʿâdete vârid ve bir müddet (24a) mütehammil-i nevâib ve şedâid olmuşidi. Ber-muktezâ-yı istiʿdâd hâsekilik ile ber-murâd ve revş ü reftârı pesendîde-i hazret-i cihândârî olduğuna binâen tebdîl-i hâsekiliği ile mümtâz ve giderek odabaşı ve hâseki ağalık ve bostancı başılık ile tâ'ir-i ikbâli bâlâ-pervâz olup baʿde'l-azl surre emîni ve kapucular kethüdâsı ve mîrâhur-ı evvel hidemâtiyle iktisâb-ı mefâhir ve merâtib-i ulyâ-yı devlete istihkākı mebâdî-i ahvâlinden bi'l-hiss ve'l-müşâhede zâhir olunduğundan rütbe-i vâlâ-yı vezâret ile manzûr-ı li-hâzâ-i mürüvvet ve Hotin ve Belgrad muhâfazalarına bi't-tevâlî taʿyîn olunarak tavr-ı âkilânesi resîde-i rütbe-i şöhret olmuşidi. Bir müddet mürûrunda şân-ı seraskerî ile donanmayı alup Özi cânibine şirâʿ-güşâ ve baʿdehû mutasarrıf-ı Ümm-i dünyâ olup bir zamân mürûrunda Cidde'ye vâli ve ber-minvâl-i muharrer kütvâl-i rûhu burc-ı bedenden hâlî oldu. Müşârünileyh müdebbir ve âkil ve umûrunda hâzım ve gayr-i gāfil haysiyyeti nümâyân ve bu cihetle sebk-i akrân etmiş bir vezîr-i kârdân idi.