Sefer hilâlinde Kırım halkı ve kabâil-i Tatar ittifâkiyle Sâhib Giray Han mesned-i hânîye ikʿâd ve takrîr ve bu taraftan menşûr ve teşrîfât irsâl olunduğu mukaddemâ tahrîr olunmuşidi. Teşrîfât-ı hümâyûnu ber-vech-i taʿzîm istikbâl ile nihâde-i vecne-i tekrîm ve umûr-ı Tatarı şurût-ı serbestiyyet üzere idâre ve tanzîm eyler iken kable'l-musâlaha Vezîr (23b) Canikli Ali Paşa ile Kırım'a taʿyîn olunan Devlet Giray Han henüz o taraflarda olup güyâ kelânterân-ı kabâil-i Tatarı tahrîk ve Kırım halkını bu bâbda mezbûrlara teşrîk edüp adem-i kabûl-i serbestiyyeti taʿlîm ve müşârünileyhden emniyet câiz olmadığını tefhîm edüp havf-i cân ile nâçâr o taraftan fekk-i lenger-i istikrâr ve müsâʿade-i rüzgâr ile üç beş gün zarfında Büyükdere'ye vusûl ve keyfiyeti arz-ı südde-i ebediyyü'l-istimrâr eyledi. Müşârünileyhin lâzım gelen tedbîri bundan sonra Kırım'dan vürûd eyleyecek tahrîrâta taʿlîk olunup şimdilik bir mahalde ikāmesi tasvîb ve iktizâ eden meûneti tertîb olundu.