Takrîbî ile melekât-ı istiʿdâd ve liyâkatten mahrûm ve hüsn ü kubhu mestûr ve nâ-maʿlûm olan baʿzı nâs-ı kusvâ-yı merâtib-i necdet ve be's olan rütbe-i vâlâ-yı vezâreti bilâ-meşakkat rübûde ve ihtilâs edüp vâlî olacakları memâliki tahrîb ve fukarâ ve zuʿafâyı garâmet-i mâliye ile taʿzîb eyleyecekleri (20b) mebâdî-i hâllerinden müstebân ve o makūleleri vedîʿa-i hazret-i Sübhân olan reʿâyâ ve zîr-destâne taslîtin vizr ü vebâli hidîv-i zemâne râciʿ olacağı bî-şübhe ve gümân olduğundan başka kesret-i vüzerâ ve ummâl an-asl fukarâyı muztaribü'l-ahvâl edegeldiği zâhir olmakla vâsıta-i şüfeʿâ veyâhûd lâ-meremmâ nâ'il-i vezâret olanlardan sekiz nefer vüzerânın tuğ ve sancakları refʿ ve birer mahalle defʿ olunup sudûr-ı mevâliye mahsûs olan arpalıklar ve kudât mansıbları dahi beyʿ men yezîd sûretini kesb ve nüvvâb-ı emvâl-i fukarâyı bu vesîle ile gasb u nehb edüp bu fesâda illet ile bess-i şikâyet edenleri tard ve ibʿâda cesâret edenlerden beş nefer kapu kethüdâsı dahi birer cezîreye nefy ü iclâ ve arpalık sâhibleri dahi fî-mâ-baʿd müstakîmü'l-etvâr ve munsıf ve dindâr nâ'ibler istihdâm etmek bâbında müftî'l-enâm cenâblarına hitâben hatt-ı hümâyûn şeref-sudûr olup mazmûn-ı münîfi kurta-i gûş-i ulemâ kılındı.