Seferler takrîbi ile Âsitâne-i saʿâdet'de envâʿ-ı erzâk girân-bahâ ile beyʿ ü şirâ ve sekene-i İstanbul giriftâr-ı muzîk-i masârif ile mahrûm-ı rû-yi hısb u rehâ olup bu keyfiyyet-i lâzime erbâbiyle meşveret ve defʿ-i iğtirâr ve tahsîl-i esbâb-ı refâhiyet bâbında herkes idâre-i perkâr-ı fikret ve encâm-ı kâr huzzârm baʿzıları muhtekirlerin melʿaneti galâya illet olup fî-mâ-baʿd mecmaʿ-ı [20a] akvât olan mahallerden bâyiʿleri getürüp bi'n-nefs halka beyʿ ve muhtekirlere vermemek üzere memâlik-i mahrûseye evâmir neşrini beyân ve re'y-i dil-pezîri sâ'irleri dahi istihsân etmeleriyle her tarafa bu mazmûnda evâmir-i şerîfe ısdâr ve tatarlar tisyâr olunduysa dahi bu tedbîrin icrâsına nezâret, İstanbul kadılarının icrâ-yi me'mûriyetlerinden olup kādı-ı vakt olan Hayâtîzâde Mehmed Said Efendi bîmâr ve leyl ü nehâr illetini tîmâr ile evkāt-güzâr olup bu hidmeti edâdan âciz ve dermân-de olduğundan fazla vakt-i azli mütekārib ve bu maslahatı idâreye muktedir âharının tedâriki vâcib olup binâen-alâ-zâlik istîfâ-yi vaktine kırk elli gün kalarak azl olunup halefinden münhal olan arpalığa Edremid mahsûlü zamm ve bu mükâfat ile tabʿ-ı nâzekinden izâle-i hadşe-i elem kılındı. Sâbıkā Mekke-i Mükerreme kadısı Alemî Yeğeni Ali Efendi'nin fatk u ratka kudreti ve îkāʿ-ı tehdîde mikneti tavr u hareketinden istidlâl ve iki eskisine takdîm ile İstanbul kadısı nasb olunup irâde-i devlet zarf-ı sâmiʿa-i intibâhına idhâl ve tehâllüf-i mansıb ile tasʿîr-i hadd-i infiʿâl eden Esseyyid Mehmed Gānim Efendi ve fuhûl-i ulemâdan Müftîzâde Ahmed Efendi birer pâye ile defʿ-i endûh ve melâl eylediler.