Mısr-ı Kāhire tarafından vaktiyle vürûd eden hazîne bir müddetten berü ve baʿzı avâik sebebiyle pesmânde-i ukde-i te'hîr ve irsâlinde istiʿcâl olunması Devlet-i aliyye'ye izhâr-ı temahhuz-ı ihtisâs eden Şeyhü'l-beled Ebüzzeheb Mehmed Bey'e taraf-ı sadr-ı müşterî-tedbîrden tahrîr olunmuşidi. Mîr-i mûmâileyh bu bâbda ibrâz-ı saʿy-i cemîl ve hazîne-i mezkûreyi tedârik ve mevsim-i şitâda bir müste'men sefînesine tahmîl edüp hübûb-ı şurta-i tevfîk ile İzmir iskelesine çıktığı inhâ ve filhâl iktizâ eden devâbb müheyyâ kılınup İzmir'den berren hareket ve Üsküdar'a vusûlü maʿlûm-ı erkân-ı devlet olduğuna binâen ihzâr olunan çekdirme ile imrâr ve mahalline teslîm ve edâ ve cânib-i Mısır'dan bu husûsun tediyesiyçün taʿyîn olunan kâşife bir sevb-i semmûr iksâ ve bir re's donanmış esb iʿtâ olunup çekdirme kapudanı dahi bir sevb hilʿat ile nâil-i ferhat ve şâd-mânî oldu.