Bâlâda ahvâli güzâriş-pezîr-i kilk-i beyân ve tahrîr olan Mısrî Ali Bey'in tesvîlâtiyle hurûc ale's-sultân töhmetini irtikâb ve birkaç seneden beri Akkâ'da ikāmet ile emvâl-i mîriyyeyi iğtisâb eden Zâhir Ömer nâm şekāvet-pîşe Devlet-i aliyye'nin musâlaha sebebi ile âzâde-i meşâgil olduğunu endişe edüp müstenidi olan Ali Bey dahi hâlik ve bi'z-zarûre istîfâ semtine sâlik olup cerâim-i güzeştesinden rücûʿ ve inâbet ve sevâlif-i eyyâmdan beri muʿattal olan emvâl-i mukātaʿâtı teslîm edeceğinden gayri fî-mâ-baʿd sâl besâl mâl-i mîrîyi edâda müsâraʿat eyleyeceğini halîmi dâiresinden müteşerrid ve bir zamandan berü idare-i dâiresinde müteferrid olan Vânî Hüseyin Efendi taʿlîmiyle der-i devlet-medâra istîfânâme baʿs ve itâre edüp madde-i mezkûre erkân-ı saltanat ile meşveret olunup "Devlet-i aliyye askeri birkaç seneden berü berren ve bahren metâʿib-i seferiyye ile bîzâr ve merkūmun istîsâlîçün vâfır mâl itlâf olunacağı dahi bedîdâr olup bu bâbda ehven-i şerr ihtiyâriyle sahîfe-i cerâimine hatt-ı afv keşîde kılınmak evlâdır" deyü erbâb-ı şûrâ ittifâk etmeleriyle keyfiyet südde-i aʿlâya arz olundukta فلا تتركن العفو عن كل ذلة فما العفو مذموم وإن عظم الجرم mefhûmuyla merkümdan sudûr eden cünha ve günah karîn-i avf-ı padişah-ı merhamet-penâh olmağla îfâ-yi şerîta-i taʿahhüd ve fî-mâ-baʿd üzerine edâsı lâzım gelen emvâlin vaktiyle teslîminde terk-i tereddüd ve taʿannüd etmek bâbında bâlâsı hatt-ı hümâyûn ile müzeyyen bir kıtʿa (17a) emr-i âlî ısdâr ve bazı hilaʿ inzimâmiyle sabıkan kapıcılar kethüdâsı Hâşim Ahmed Ağa o tarafa tisyâr olundu.