Üç defʿa mesned-i meşîhata zîb ü zînet veren Dürrîzâde Mustafa Efendi bir müddetten berü gunûde-i bâliş-i bîmârî ve işbu Zilhicce'nin yedinci günüdür girân-kadr vücûdu sadef-i adem ü fenâda mütevârî olup namazı Câmiʿ-i Sultan Mehmed'de cemm-i gafîr ile edâ ve Edirne-kapı'sı hâricinde defn ile hakkında rahmet-i Mevlâ niyâz ü recâ olundu. Tercüme: Müşârünileyh yüz ondört târîhinde Dürrî Efendi merhûmun sulbünden lemʿa-pâş-i zuhûr ve firâk-künende-i miyân-ı gayb-i huzûr oldukta. Nazm: Hüner erbâb-ı câh elinde eğer / Bulunursa süvâr zerrîndir. Fukarâya medâr-ı kesb-i maʿâş / Dinle bu hikmeti ki rengîndir. Meʿâlini tahayyül ve taleb-i ilme tevaggul edüp otuzüç târîhinde ibtidâ-i hâric ile dâhil-i silsile-i müderrisîn ve devr-i medâris ederek ibtidâ-i altmışlı ile kâm-bîn olup bu esnâda pederleri mesned-i fetvâya dâric ve mahdûmu Galata kazâsıyla ve der-akab Edirne ve Mekke pâyeleriyle mübtehic etmişidi. Pederleri vefât ve itmâm-ı enfâs-ı hayât ettikten sonra İstanbul kazâsıyla icrâ-yi ahkâm ve elliüç târîhinde müddet-i örfiyyesin itmâm eyledi. Ellidokuzda Anadolu sadâretiyle sît-i şânı evc-gîr ve altmışdört ve altmışdokuzda ber-vech-i tekrîr sadâret-i Rumeli ile tevkîr ve ahd-i Osman Hânîde dokuz mâh mikdârı mutasaddî-i umûr-ı fetvâ ve bi-hükm-i takdîr-i emed-i yesîrde azl ile züccâc-ı (16a) hâtırı seng-zede-i cevr ü ezâ olup ahd-i Sultan Mustafa Hânîde ke'l-evvel sadr-ı fetvâya iʿtilâ ile mübeccel ve beş sene kadar medâr-ı akd ü hâl olduğu hengâm, yine zehrâbe-i azl ile telh-kâm olmuşidi. Devr-i Sultan Abdülhamîd Hânîde elmas-pâre-i iʿtibârı şekl-i müsellesde nümâyân, yaʿni üçüncü defʿa câh-ı meşîhat ile der-i vücûdu dirahşân olup yedi mâhdan sonra töhmet-i şeyb ve insilâb-ı şuʿûr ile maʿzûl ve hânesinde duʿâ-yi devlete meşgûl iken târîh-i merkūmda ber-vech-i muharrer terk-i ʿâlem-i nâsût ve azm-i sûy-i lâhût eyledi. Müşârünileyh hüsn-i sûret ve cemâl ve behcet ile mevsûm ve derece-i ilm ü kemâli beyne'l-ulemâ maʿlûm olup, zamânı zevk u safâ ile mürûr ve servet ü yesâr cihetiyle dahi mahsûl-i ömrü numûne-nümâ-yi eyyâm-ı sûr olduğundan başka vakt-i iftâsında bile müdârese-i ulûmdan fârig olmayup hem-asrı olan fuhûlü meclisine idhâl ve mebâhis-i ilmiyyeden bir bahs açup tasarrûfât-ı ilmiyyelerinden sûrî ve maʿnevî lezzet-i rûhânî ve vicdânî istihsâl eyler idi. Teksîr-i kitâb ve taʿayyüş-i ketebeye ihzâr-ı esbâb kasdıyla zamânında müdevven ve dahmü'l-hacm katı çok kütüb-i nâfiʿa istiktâb ettirdiği meşhûd ve bu sebeble mazhar-ı duʿâ-yi nâ-maʿdûd olmuştur. Salâh-ı hâl ve nekāvet-i bâl ile dahi meşhûr olup şöyle ki etrâf u eknâfda dâir-i vüzerâ ve mütemevvilân-ı aʿyândan bir şey kabûl etmemekle mevsûf ve beyne'l-aşşaʿîn dergâh-ı Hakk'a tevessül ile hast-gâr-ı mağfiret olduğu maʿrûfdur. Hasılı dünyası min-külli'l-cihât maʿmûr ve kesret-i encâb-ı evlâd ile (16b) ferîde-i dühûr ve âlim-i âmil ve cehbez-i kâmil bir zât-ı hamîdü'l-hasâil idi.